QR Prezıdenti N. Nazarbaevtyń «Tańdamaly sózderi» jınaq bolyp basylyp shyqty
ASTANA. QazAqparat - Astanada Qazaqstannyń Tuńǵysh Prezıdenti - Elbasynyń kitaphanasynda Nursultan Nazarbaevtyń qazaq tilinde basylyp shyqqan tańdamaly sózderi jınaǵy kóptomdyǵynyń tusaýkeser rásimi ótti.
«Tańdamaly sózder» atty 7 tomdyq jınaq 9 kitaptan turady. Jınaqty QR Prezıdenti Keńsesiniń bastyǵy Mahmud Qasymbekov bastaǵan redaktsııalyq top qurastyrdy.
«Elbasymyz Nursultan Nazarbaevtyń ár jyldary úlken forýmdarda sóılegen sózderi men baıandamalarynyń barlyǵyn jınaqtap, ony qazaq tiline tolyǵymen aýdaryp, tańdamaly retinde 9 kitap, 7 tom retinde basyp shyǵardyq. Nursultan Ábishulynyń 1989 jyly Qazaqstan Kompartııasynyń birinshi hatshysy bolyp kelgennen bastap, 2013 jylǵa deıingi sóılegen sózderiniń barlyǵy jınaqtalyp, osy kitaptarǵa endi. Bul kitaptardaǵy sózder men baıandamalardy, joldaýlar men maqalardy is júzinde el táýelsizdiginiń shejiresi dep aıtýǵa bolady», - deıdi M. Qasymbekov.
Onyń aıtýynsha, keıbir tarıhı kezdesýlerdegi Prezıdent sózderin tirnektep jınaý qıynǵa soqqan. Sebebi, keıbir baıandamalar eshbir gazette basylmaı, sol kezdegi tilshilerdiń jeke qoryndaǵy dıktofondarynda, beıne qorlarynda, stenogrammalarynda ǵana saqtalyp qalǵan. «Solardy jınaqtap, izdestirip, qaıtadan qaǵazǵa túsirýge týra keldi. Maqalada basylyp, muraǵatqa ótip ketken baıandamalardy da jınaqtadyq», - dep atap ótti M. Qasymbekov.
Budan basqa, sóılegen sózder mátinderiniń úlken kólemin orys tilinen qazaq tiline aýdarý, sondaı-aq naqtylaý jáne memlekettik tildegi termınologııalyq apparatty aınalymǵa engizý jóninde úlken jumystar atqarylǵan.
Materıaldardyń jınalýyna qaraı jınaqtyń jalǵasyn basyp shyǵaryp otyrý josparlanýda.
