QR Prezıdenti N.Nazarbaev tyń ıgerýge qatysqan eńbek ardagerlerin mereıtoımen quttyqtady (FOTOREPORTAJ)

ASTANA. QazAqparat - Búgin Astanada tyń ıgerýge 60 jyl tolýyna oraı QR Aýyl sharýashylyǵy mınıstrliginiń eńbek ardagerlerin ulyqtaý merekelik kontserti ótti.

Osyǵan oraı QR Prezıdenti tyń ıgerýge qatysqan eńbek ardagerlerine óziniń quttyqtaý sózderin joldady. Atalmysh hatty QR Aýyl sharýashylyǵy mınıstri Asyljan Mamytbekov oqyp berdi.

"Ardaqty eńbek ardagerleri! Sizderdi tyń jáne tyńaıǵan jerlerdi ınerýdiń bastalýyna 60 jyl tolýymen quttyqtaımyn! Tyń ıgerý kezeńi Qazaqstandy sarqylmas astyq qoryna aınaldyrdy. Búginde elimiz astyq eksporty boıynsha álemdik kóshbasshylar qatarynda. Bul ýaqyt qazaqstandyqtardyń qajyrly eńbegimen jáne erik-jigerimen jazylǵan dańqty tarıhynyń jarqyn kezeńderiniń biri. Tyń - azyq-túlik qaýipsizdigin qamtamasyz etýdiń kózine aınalyp, ekonomıkanyń kóptegen salalary men áleýmettik ınfraqurylymdardyń qarqyndy damýyna yqpal etti. Búgingi tańda elimizdiń agroónerkásiptik kesheni aldynda turǵan maqsattardyń aýqymy odan da zor. "Qazaqstan-2050" strategııasynda aýyl sharýashylyǵyn damytý - eń basym baǵyttardyń biri retinde atalǵan. Barshańyzǵa jemisti eńbek pen jańa tabystar tileımin!", - delingen Elbasynyń quttyqtaýynda.

Saltanatty jıynnan soń mınıstr tyń ıgerýge qatysqan 20 ardagerge "Eńbek ardageri" ordenderin tabys etti.

Aıta keteıik, 1953 jyly burynǵy Keńes Odaǵynyń bıdaı egetin egis alqabynyń 11,3 paıyzy Qazaqstannyń úlesinde bolsa, 1960 jyly onyń úlesi 30 paıyzǵa jetti. Jalpy tyń ıgerilgen jeti jylda Qazaqstanda 100 mln. tonna bıdaı óndirildi.