QR Prezıdenti N.Nazarbaev: Qazaqtyń tarıhy - birigý men tutastaný tarıhy
ASTANA. QazAqparat - Ulttyq mýzeıde jańa Qazaqstannyń tarıhyna aıryqsha mán beriletin bolady. Búgin elorda kúni qarsańynda Qazaqstan Respýblıkasy Ulttyq mýzeıiniń resmı ashylý rásimi barysynda Elbasy Nursultan Nazarbaev osylaı málim etti.
«Dáýirlerge laıyq is tyndyrǵan jıyrma jyldan astam ýaqyt el tarıhynda eń jasampaz kezeń bolyp tabylady. Keıingi urpaq búgingi býyn bastaǵan uly isterdi laıyqty jalǵastyratynyna senimdimin. Qazaqstan tarıhy keleshekke tek qana beıbit bastamalarmen, jarqyn istermen jalǵasatyn bolady»,- dedi Elbasy.
N.Nazarbaev búgin esigin aıqara ashyp otyrǵan tarıh mýzeıi san jyldar boıǵy jasampazdyq jádigerlermen tolyǵa beretinin atap ótti. Osy oraıda Memleket basshysy tarıhı jádigerlerimizdi ulyqtap, olardy árbir sheteldik qonaqqa tanystyrý kerek ekenin jetkizdi.
«Qazaqstannyń búgingi jetistikterin jahanǵa jarqyrata túsý - bizdiń ortaq paryzymyz. Qazaqtyń tarıhy - birigý men tutastaný tarıhy. Búgin jaı ǵana mýzeı ashylyp otyrǵan joq, san myń jyldyq shejire jazylatyn Qazaqstan tarıhynyń jańa beti ashylyp otyr», - dedi Prezıdent.
