QR Prezıdenti N.Nazarbaev BUU BA mereıtoılyq sessııasynda birqatar bastama kóterdi - BAQ
Nazarbaev 2045 jylǵa deıingi jahandyq damý josparyn qurýdy usyndy, dep habarlady TASS óz materıalynda.
«Jahandyq strategııalyq bastamanyń 2045 josparyn ázirleýdi usynamyn. Onyń máni - barlyq ulttardyń álemdik ınfraqurylymǵa, resýrstarǵa jáne naryqtarǵa qol jetkizýiniń ádil sharttary negizinde álemdik damýdyń jańa trendin qalyptastyrý, sondaı-aq adamzattyń damýy úshin jalpyǵa ortaq jaýapkershilikti ornyqtyrý», - degen QR Prezıdentiniń sózin keltiredi agenttik.
TASS atap ótkendeı, Qazaqstan kóshbasshysy BUU-nyń Ekonomıkalyq jáne Áleýmettik keńesin Jahandyq damý Keńesine aınaldyrý kerek dep sanaıdy. «Onyń quramyna Birikken Ulttar Uıymy Bas Assambleıasy saılaǵan múshe memlekettermen qatar Birikken Ulttar Uıymynyń mamandandyrylǵan mekemeleriniń barlyq basshylary, sonyń ishinde Halyqaralyq valıýta qorynyń da basshylary ene alar edi. Keńeske Jahandyq ekonomıkalyq retteýshiniń mindetteri júktelýge tıis», - dedi N.Nazarbaev.
QR Prezıdentiniń sózderin halyqaralyq BAQ birneshe bólikke bóldi. Kóterilgen bastamalarǵa nazar aýdaryldy, sonyń ishinde ulttyq álemdik valıýtanyń qurylýy men terrorızmge qarsy kúrestiń biryńǵaı álemdik júıesin qurý, BUU QK sanktsııalary men aıryqsha quzyretteri de bar.
«Terrorızm men dinı ekstremızmniń qaýpi jahandyq aýqymǵa jaıylyp barady. BUU qoldaýymen halyqaralyq terrorızm men ekstremızmge qarsy tura alatyn biryńǵaı álemdik jeli qurýdy usynamyn», - degen Nursultan Nazarbaevtyń sózderin keltirdi RIA Novostı.
Bul mindetti júzege asyrý úshin BUU-nyń terrorızmmen kúres jónindegi máseleniń bárin qamtıtyn qujatyn ázirlep, qabyldaý qajet dep esepteıdi qazaqstandyq kóshbasshy.
Trend Ázerbaıjan halyqaralyq agenttigi atap ótkendeı, Nursultan Nazarbaev BUU Bas Assambleıasynyń 70-shi sessııasynyń jalpy pikirsaıysynda ıadrolyq qarýdan azat álemge qol jetkizý jónindegi Jalpyǵa ortaq deklaratsııa qabyldaý kerektigin atap ótti. Ol Almatyda ótken Iran ıadrolyq baǵdarlamasy boıynsha kelissózderdiń eki kezeńin, sonymen qatar elde MAGATE-niń Halyqaralyq az baıytylǵan ýran bankin qurý jaıyn eske saldy.
Sonymen qatar, RIA Novostı QR Prezıdenti Nursultan Nazarbaev álemdik valıýta ázirleý baǵytyndaǵy BUU-ǵa múshe elderdiń kúsh-jigerin biriktirýdi usynǵanyn jazdy.
Qazaqstan basshysy BUU Bas Assambleıasynyń 70-shi sessııasynyń trıbýnasynan jahandyq daǵdaryspen kúresti qazirgi kezde zańdylyq, demokratııalylyq, básekelestik, tıimdilik jáne halyqaralyq baqylaý ustanymdaryna saı kelmeı otyrǵan emıssııa men álemniń rezervtik valıýtalary aınalymyn retteýden bastaý qajet ekendigin atap ótti».
«HHI ǵasyrda álemge sapalyq turǵydan jańa qarjy quraldary kerek. Jahandyq ornyqty damý men ósip-órkendeýdiń maqsattary men mindetterine saı keletin ult ústilik álemdik valıýta ázirleý baǵytyndaǵy BUU-ǵa múshe elderdiń kúsh-jigerin biriktirý qajet», - dedi N.Nazarbaev.
Sóz sońynda QR Prezıdenti BUU shtab-páterin Azııaǵa kóshirýdi usyndy.
INTERFAX.RU jazǵandaı, N.Nazarbaev 70 jyl buryn Jenevada Birikken Ulttar Uıymy qurylǵan kezde onyń shtab-páterin Nıý-Iorkte ornalastyrýǵa sheshim qabyldanǵanyn eske saldy.
«Bul sol kezeńde halyqaralyq qatynastar boıynsha Batys Jarty sharynyń roli artqandyǵyna baılanysty bolǵan edi. Álemdi damytý ortalyǵy Kári qurlyqtan Jańa qurlyqqa, Eýropadan jahandyq órleýdiń jańa orny - AQSh-qa, Nıý-Iorkke aýysty. Sodan beri kóp nárse ózgerdi, álem ózgeshe qalyptasty», - dedi Qazaqstan Prezıdenti.
«21 ǵasyrda damý damý ortalyǵy álemniń eń úlken qurlyǵy - ǵalamshar turǵyndarynyń úshten ekisi mekendeıtin, iri resýrstar shoǵyrlanǵan Azııaǵa qaraı oıysýda. Azııanyń damyp kele jatqan ekonomıkalarynyń qýatty serpini jahandyq úderisterdiń jańa sıpatyn tanytty. Osy úderisti eskere otyryp, memleketterdiń ózara qarym-qatynasyna jańa serpin berý úshin bul tarıhı múmkindikti paıdalanýdyń mańyzy zor. Sondyqtan BUU shtab-páterin Azııaǵa kóshirý máselesin oılastyrýdy usynamyn», - dep túıindedi N.Nazarbaev.
