QR Prezıdenti Mıýnhende Germanııanyń úzdik kompanııalarynyń múmkindikterimen tanysty
MıÝNHEN. QazAqparat – Qazaqstan Prezıdenti Qasym-Jomart Toqaev Mıýnhen qalasynda «Reverse Logistics Systems GmbH» jáne «CCR Logistics Systems AG» kompanııalarynyń basqarma tóraǵasy Patrık Vıdemanmen kezdesti, dep habarlaıdy QazAqparat tilshisi.
Kezdesýde Memleket basshysy Germanııada úzdik dep tanylǵan atalǵan kompanııalardyń qyzmetimen tanysty.
Óz kezeginde Patrık Vıdeman Qazaqstan aýmaǵynda birlesip jumys isteýge qatysty usynystar pysyqtalǵanyn atap ótti.
Onyń paıymynsha, turǵyndardyń qoqysqa baılanysty túsinigin ózgertý kerek. Bul turǵyda qoldanysta bolǵan ár zattyń qaıta óńdelýine erekshe nazar aýdarǵan jón.
Atap aıtqanda, jańa júıe aıasynda qoldanylǵan zattardy jınastyryp, ony «depozıtke» tapsyrady. Ár tapsyrylǵan taýardan 25 tsent qaıtarylady. Bul qadamdar Eýropanyń birneshe memleketiniń tájirıbesi negizinde iske asyrylýda. Atalǵan júıe 13 jyldan beri paıdalanylyp keledi. Máselen, árbir ydysqa jeke kod beriledi. Osy arqyly árbir ónimniń belgilengen jerge jetkenin bilip otyrýǵa bolady.
«Reverse Logistics Systems GmbH» kopanııasy «Atos» kompanııasymen birlesip kóptegen elde depozıttik-qaıtarym júıesin (taromat) engizýmen aınalysady. Atalǵan júıe ekonomıkanyń ekologııazatsııalanýyna jáne qorshaǵan ortany qorǵaýǵa úlken úles qospaq. Bul júıe GFR, AQSh, Kanada, Fınlıandııa, Shvetsııa, Nıderland, Lıtva men Estonııa sııaqty memelketterde qoldanysqa engen.
2006 jyly negizi qalanǵan kompanııanyń bas ǵımaraty Mıýnhen qalasynda ornalasqan.
RLG-ge qarasty 30 enshiles kompanııa bolsa, álemniń 80 memleketinde olardyń ókildigi bar. Jyldyq qarjy aınalymy – 700 mln eýro.
Kompanııa jańa, ıaǵnı kepildi-qaıtarym depozıttik júıeni Qazaqstanda da engizýdi kózdep otyr. 2018 jyldyń jeltoqsanynda Qazaqstan-Germnııa iskerlik keńesi aıasynda «KazakhInvest» AQ jáne atalǵan kompanııa arasynda áriptestik memorandýmyna qol qoıyldy. Kelisim ornaǵan jaǵdaıda, 4-5 myń adamdy jumyspen qamtıdy degen boljam bar.
