QR Prezıdenti: Mınıstrlikterge basshylyqqa kelgender - óz salasynyń mamandary
ASTANA-ULYTAÝ. QazAqparat - Mınıstrlikterdiń basyna kelgen azamattar men azamatshalardyń jasy 40 pen 50-diń arasynda. «Habar» telearnasyna eksklıýzıvti suhbat bergen QR Prezıdenti Nursultan Nazarbaev osylaı málim etti.
Elbasy Jaqynda Úkimette jasalǵan biraz ózgerister Mınıstrler kabınetindegi sheneýnikterdiń sany shaǵyn bolýyna jáne olardyń atqaratyn jumystaryn aýqymdy etýge baılanysty ekenine aıta kele, «Baıqasańyzdar, mınıstrlikterdiń basyna kelgen azamattar men azamatshalardyń jasy 40 pen 50-diń arasynda. Kópshiligi aǵylshyn tilin ıgergen. Olar - óz salasynyń mamandary. Bul basshylar sheteldiktermen sóılese alady, kelissózder júrgizýge qaýqarly», - dedi.
Osy oraıda Memleket basshysy búginde elimizde bilikti jas mamandar qatary kóbeıip ósip kele jatqandyǵyn atap ótti.
«Olardyń barlyǵy memlekettik qyzmetpen aınalysýda. Olar Qazaqstanda eń úlken patrıottardyń biri bolady. Sonymen qatar bul mamandar Qazaqstandy alǵa súıreıdi dep senemin», - dep túıdi N.Nazarbaev.
