QR Prezıdenti: Maqsatymyz - aıqyn, baǵytymyz - anyq, muratymyz - asqaq

ASTANA. QazAqparat - El ekonomıkasyn jańǵyrtýǵa baǵyttalǵan tsıfrlandyrý protsesi qarqyndy júrip jatyr. Bul týraly Qazaqstan Respýblıkasynyń Táýelsizdik kúnine arnalǵan saltanatty jıynǵa qatysqan Elbasy Nursultan Nazarbaev aıtty, dep habarlaıdy QazAqparat tilshisi.

«El qýatty bolmaı, egemendik turaqty bolmaıdy» degen qanatty qaǵıda bar halqymyzda. Sondyqtan, bizdiń maqsatymyz - aıqyn, baǵytymyz - anyq, muratymyz - asqaq. Ornyqty damýǵa jol ashatyn memlekettik baǵdarlamalar men tyń bastamalar júzege asyrylýda. Atap aıtqanda, el ekonomıkasyn jańǵyrtýǵa baǵyttalǵan tsıfrlandyrý protsesi qarqyndy júrip jatyr. Halyqtyń ál-aýqatyn jaqsartýdy kózdeıtin «Bes áleýmettik bastama» elimizdiń damýyna oń serpin berdi. Bıylǵy qazan aıyndaǵy Joldaýym azamattarymyzdyń turmys sapasyn arttyrý máselesine arnaldy. Jahandyq básekege qabilettilikti qamtamasyz etetin ekonomıkalyq ósimniń ózgeshe modelin qurýǵa qadam bastyq», - dedi Nursultan Nazarbaev.

Memleket basshsy qazirgi tańda ulttyq sananyń jańarýyna tikeleı yqpal etetin Úshinshi jańǵyrýdyń máni zor ekendigin atap ótti.

«Sonyń aıasynda bıyl Túrkistan qalasy qaıta túlep, oblys ortalyǵy mártebesin ıelendi.  Ǵasyrlardy jalǵap kele jatqan túrki jurtynyń rýhanı astanasy laıyqty ornyn aldy. Shyraıly Shymkent halqynyń sany bir mıllıonnan asyp, elimizdegi úshinshi megapolıs atandy. Sóıtip, Almaty jáne Astana sııaqty respýblıkalyq mańyzy bar qalalardyń qataryna qosyldy», - dedi QR Prezıdenti.