QR Prezıdenti: Mahabbat - Otanǵa, elge degen uly sezim
ASTANA. QazAqparat - Elimizdiń jetekshi telearnalar jýrnalısterine bergen suhbaty barysynda sezim taqyryby da qozǵalyp, QR Prezıdenti Nursultan Nazarbaev mahabbat uǵymyna qatysty óz túsinigin de aıtty.
«Mahabbat - bul dúnıedegi úlken uǵym, aýqymy keń. Otanǵa degen mahabbat, Týǵan jerińe degen mahabbat, óz jumysyńa degen mahabbat bar, aýqym-túsinigi keń. Mahabbatsyz dúnıe - bos, mahabbatsyz, sezimsiz eshnárse jasaý múmkin emes», - dedi N. Nazarbaev.
«Men keıde otyryp alyp, ózimizdiń 20 jyldyǵymyzda qandaı qıyn kezeńderden ótkenimizdi eske alamyn. Keńes Odaǵy ydyrady, dúken sóreleri qańyrap bos qaldy, jalaqy men zeınetaqyny tóleýge eshqandaı qarajat bolmady. Sonda men Almatyda úıden kólikpen shyqqanda kóshedegi adamdarǵa jolda toqtap, kósheniń ortasynda turyp-aq áńgimelesetinmin.
Myńdaǵan saparlar boldy, myńdaǵan mıtıngilerde sóz sóılep, túsindirdik. Sosyn, memleketti taqyr jerden qurdyq: ózimizdiń armııa da, ózimizdiń Úkimet te, polıtsııa da, saıasat ta bolmady. Mektebimiz de, Konstıtýtsııamyz da joq edi. Osynyń bárin qurýǵa týra keldi. Kóptegen elderdiń konstıtýtsııalaryn zerdeledik, Qazaqstanǵa keletin memleketterdi izdedik. Sosyn, Ońtústik Shyǵys Azııanyń ekinshi daǵdarysy bastaldy. Buny da eńserý kerek boldy. Aıtpaqshy, biz qazir munaı dep otyrmyz ǵoı, al 1998 jyldary munaıdyń barreli 10 dollar ǵana edi. Al mine, 60 dollarǵa túsip edi, biz oıbaılaı bastadyq», - dedi N. Nazarbaev. Sonymen qatar, Elbasy búginge deıingi memleketti qalyptastyrý isiniń bári óziniń kóz aldynda ótkenin, bárin óz júreginen ótkizgenin jetkizdi. «Ata-anamnan boıyma daryǵan qýat meni udaıy alǵa jeteleıdi. Ekinshiden, bul - Otanǵa, elge degen uly sezim. Ony ispen kórsete bilý de kerek», - dedi Prezıdent.
