QR Prezıdenti latyn álipbıi jaıly: Naǵyz táýelsizdik - ol tildiń de táýelsizdigi

ASTANA. QazAqparat - Latyn qarpindegi qazaq álipbıine qatysty máselede naqty iske kirisý qajet. Otandyq BAQ ókilderimen kezdesý barysynda Qazaqstan Prezıdenti Nursultan Nazarbaev osylaı dep pikir bildirdi, dep habarlaıdy «QazAqparat» HAA tilshisi.

Elbasy óz sózinde latyn grafıkasyndaǵy álipbıdiń mańyzdylyǵyna toqtala ketti.

«Táýelsizdik alǵan kúnderdiń basynan bastap aıtyp kele jatyrmyz osy máseleni. Naǵyz táýelsizdik - ol tildiń de táýelsizdigi. Munyń beri jaǵynda búkil dúnıeniń 70 protsenti sol álipbımen jumys isteıdi. Birinshiden - bul ǵylymnyń, tehnologııanyń, ınternettiń álipbıi. Bul álipbı qazaqtyń tiline qanshalyqty paıda ákeletinin jazýshylar, jýrnalıster jaqsy biledi. Kırıllıtsanyń ishinde bizde qoldanylmaıtyn áripter bar. Ol jaǵyn da oılaýymyz kerek. Úshinshiden biz órkenıetti elderdiń arasynda qosylyp, 30 damyǵan eldiń qatarynan kórinemiz desek, solarmen birge bolýymyz kerek qoı. Sondaı-aq, qazaq tilin basqa halyqtardyń úırenýi úshin de bul álipbıdiń paıdasy bar», - dedi Nursultan Nazarbaev.

Memleket basshysy qazirgi tańda burynǵy jarııalanǵan kitaptardy ınternet arqyly jańa álipbıge aýdarý qıynshylyqqa túspeıtinin eskertip ótti.

«Bul máselede «nege, qalaı?» degen suraqtardy qoıyp, naqty iske kirisý kerek. Halyqtyń kópshiligi, 95 paıyzdan kóbi osyny qoldady. Ásirese, óz halqymyz. Kırıll qarpi de qalaı jumys istedi, solaı jumys atqara beredi. Bizde birinshi synyptan bastap balalar úsh tilde oqıdy. Qazaq, orys jáne aǵylshyn tilderinde. 2025 jylǵa qaraı mektep bitirýshilerdiń barlyǵy jumys atqara alatyndaı deńgeıde úsh tildi meńgeretin bolady. Onda eshqandaı másele týyndamaıdy. Barlyq mektepterde birinshi synyptan bastap aǵylshyn tili oqytylady. Qandaı álipbımen oqytylady? Latyn álipbıinde. Sondyqtan, balalar ony tez meńgeredi», - deıdi Prezıdent.

Memleket basshysy sonymen birge, latyn álipbıine kóshken túrki tildes aǵaıyndardyń jetistigin atap ótti.

«Men «Egemen Qazaqstan» gazetine, qazaq tildi basylymdardyń bir buryshynda sol tilmen jaza berýdi usynamyn. El oqı bersin. Ózim kabınetimde otyryp, Abaıdyń sózderin latyn álipbıimen jazamyn. Bastapqyda ońaı bolmaıdy. Kósheniń attaryn, aýyldyń atttaryn eptep sol álipbıge kóshiremiz. Gazetterdiń bir buryshtarynda sol álipbımen jazylar bolsa, eldiń sol arqyly tili jattyǵady», - deıdi QR Prezıdenti.
Elbasy kezdesý barysynda «Bolashaqqa baǵdar: rýhanı jańǵyrý» baǵdarlamalyq maqalasy jóninde pikir bildirgen bolatyn.