QR Prezıdenti qyrǵyz halqyn el Táýelsizdiginiń 30 jyldyǵymen quttyqtady

NUR-SULTAN. QazAqparat - Memleket basshysy Qasym-Jomart Toqaev Qyrǵyzstan Prezıdenti Sadyr Japarovqa jedelhat joldap, qazaqstandyqtardyń jáne jeke óziniń atynan Qyrǵyzstan basshysyn jáne qyrǵyz halqyn el Táýelsizdiginiń 30 jyldyǵymen shyn júrekten quttyqtady, dep habarlaıdy Aqorda.

«Bul – egemen Qyrǵyzstan tarıhyndaǵy ulttyń birligin, turaqtylyǵyn, jasampazdyq rýhyn beıneleıtin, memlekettilikti odan ári nyǵaıtý, Qyrǵyz eliniń uzaq merzimdi jáne turaqty damýy úshin máńgilik mańyzdy kún», – delingen jedelhatta.

Qasym-Jomart Toqaev qazaq-qyrǵyz qatynastarynyń damýyn joǵary baǵalady.

«Tarıhy tereń baýyrlas halyqtardyń ortaq múddeleri men ǵasyrlar boıǵy dostyǵy jáne tatýkórshilik dástúrin saqtaı otyryp, Táýelsizdiktiń alǵashqy sátinen-aq qazaq pen qyrǵyz ıyq tiresip, ózara jetistikterge shynaıy qýanyp, bir-birine únemi qoldaý kórsetip keledi. Kúsh-jigerimizdi jumyldyryp, kóp qyrly yntymaqtastyǵymyzdyń turaqty damýyna tyń serpin bere alatynymyzǵa senimdimin. Bul qazaq-qyrǵyz strategııalyq seriktestigi men odaqtastyǵy úshin jańa kókjıekterge jol ashady», – dep jazdy Memleket basshysy.

Qasym-Jomart Toqaev Sadyr Japarovtyń jaýapty memlekettik qyzmetine tolaǵaı tabys, baýyrlas qyrǵyz halqyna órkendeý men órleý tiledi.