QR Prezıdenti: Quqyq qorǵaý qurylymdary men armııada qarjylyq tólemder ortasha 30% artady
«Bıylǵy jyldyń daǵdarysty jaǵdaıynda kúshtik qurylymdar qyzmeti tıimdiliginiń mańyzy kúrt artty. Karantındik is-sharalarǵa jumyldyrylǵan ishki ister organdarynyń qyzmetkerlerin yntalandyrý úshin 18 mlrd teńgeden astam bólindi. Aldaǵy 3 jyldyń ishinde quqyq qorǵaý qurylymdary men armııada qarjylyq tólemder ortasha 30 paıyzǵa artatyn bolady», - dedi Memleket basshysy.
QR Prezıdenti eldegi qoǵamdyq turaqtylyq pen áleýmettik progress myqty ekonomıkalyq negiz bolǵan kezde ǵana múmkin ekendigin basa aıtty. Qatań shekteýler men karantınge qaramastan halyqtyń ekonomıkalyq belsendiligi saqtalǵanyn, bızneske qalypty jumys isteýi úshin kómek kórsetilgenin atap ótti. Daǵdarysqa qarsy sharalar toptamasy aıasynda shaǵyn jáne orta bıznes sýbektileri birqatar jeńildikter alǵanyn eske saldy.
«Jalpy qoldaý kólemi 1,5 trln teńgeden asyp tústi. Bul 8 trln teńgege ónim shyǵarý kólemin saqtap qalýǵa múmkindik berdi. 200 myńnan astam jumys orny qurylyp, otandyq kompanııalar shamamen 500 mlrd teńgege memlekettik tapsyrystar aldy. Osylaısha, 2025 jylǵa qaraı shaǵyn jáne orta bıznestiń jalpy ishki ónimdegi úlesi 35 paıyzǵa jetýi tıis», - dedi Qasym-Jomart Toqaev.
