QR Prezıdenti kýbogynyń alǵashqy týr oıyndary ótti
ASTANA. Tamyzdyń 11-i. QazAqparat /Jasulan Amanbaıuly/ - QR Prezıdenti kýbogi jolyndaǵy jarystyń alǵashqy oıynynda «Barys» hokkeı klýby Máskeý oblysynyń «Atlant» komandasyn jeńdi.
Keshe, tamyzdyń 10-y kúni Kýbok týrnıriniń alǵashqy týrynda Rıga qalasynyń «Dınamo» klýby men Belarýs elinen kelgen «Dınamo» komandasy ózara kezdesti. Oıyn 3:2 esebimen latvııalyqtardyń jeńisimen aıaqtaldy.
Al Astananyń «Barysy» Qurlyqtyq hokkeı lıgasyndaǵy burynnan kele jatqan qarsylasy Máskeý oblysynyń «Atlant» komandasymen muz aıdynyna shyǵyp, 4:2 esebimen basym tústi.
«Barys» - «Atlant» kezdesýiniń alǵashqy mınýttarynda basymdyq tanytqan elordalyq oıynshylar birinshi kezeńniń 4-shi mınýtynda qarsylastarynyń qaqpasyna alǵashqy shaıbany saldy. Gol avtory - Maksım Hýdıakov. Ekinshi kezeńniń 10-shy sekýndynda «Barystyń» jańa oıynshysy, chehııalyq legıoner Lýkash Kashpar esepti eseledi.
Degenmen qarymta sátterdiń birinde «Atlant» oıynshysy Sergeı Mozıakın shıraqtyq tanytyp, esepti 2:1-ge jetkizdi. Kóp uzamaı «Barys» oıynshylary Vadım Krasnoslobodtsev pen komandaǵa jańadan qosylǵan Irjı Novotny bir-bir shaıbadan gol salyp, tablodaǵy kórsetkishti 4:1-ge ózgertti.
Oıynnyń 51-shi mınýtynda «Atlant» komandasy astanalyqtardyń qaqpasyna qarymta shaıba engize aldy. Goldy Evgenıı Nýrıslamov saldy.
Búgin, jarystyń ekinshi kezeńinde «Barys» Rıga qalasynyń «Dınamo» komandasymen kezdesedi. Mınskilik «Dınamo» komandasy «Atlant» hokkeıshilerine qarsy oınaıdy.
