QR Prezıdenti Kýbogynda aýyr jaraqat alǵan hokkeıshiniń beti beri qarady
ASTANA. QazAqparat - «Neftehımık» klýbymen aradaǵy kezdesýde aýyr jaraqat alǵan «Avangard» hokkeıshisi Krıstıan Kýdroch Astananyń birinshi qalalyq aýrýhanasynda emdelýde, dep habarlady «Barys» hokkeı klýbynyń baspasóz qyzmetinen.
«Ótken maýsymdy «Barys» sapynda ótkizgen oıynshyǵa taıaýda ǵana klýb basshylyǵy baryp qaıtty. Buǵan qosa, komandanyń aspazy Krıstıan úshin arnaıy mázir ázirledi jáne ol tolyq emdelip shyqqanǵa deıin tolyqkeshendi taǵammen qamtamasyz etetin bolady. Hokkeıshiniń jaǵdaı kún saıyn jaqsaryp keledi», - delingen klýb taratqan aqparatta.
Esterińizge sala keteıik, «Avangard» - «Neftehımık» matchtarynyń bir kezeńinde birinshi komanda oıynshysy Krıstıan Kýdroch jaraqat alǵan bolatyn. Oryndyqqa deıin ózi jetken ol, biraz ýaqyttan keıin esinen tanyp qalǵan edi. «Qazaqstan» sport saraıynda turaqty kezekshiliktegi dárigerler oǵan alǵashqy kómek kórsetti, alaıda ol esin jımaǵandyqtan, aýrýhanaǵa jetkizýge týra kelgen-di.
Al Qazaqstan Respýblıkasy Prezıdenti Kýbogy 5-shi halyqaralyq týrnıriniń jeńimpazy ombylyq «Avangard» klýby atanǵan bolatyn. Olar fınaldyq kezeńde elordalyq «Barys» komandasyn 5:3 esebimen tize búktirdi.
