QR Prezıdenti Kýbogynda 15 eldiń boksshylary ózara myqtyny anyqtaıdy
ASTANA. QazAqparat - Sanaýly saǵattardan keıin Astanadaǵy «Dáýlet» sport kesheninde Qazaqstan Respýblıkasy Prezıdentiniń Kýbogi úshin bokstan VI Halyqaralyq týrnır bastalady, dep habarlaıdy QazAqparat tilshisi.
Boks boıynsha QR Prezıdentiniń Kýbogyna 15 eldiń ókilderi, atap aıtqanda Belarýs, Úndistan, Reseı, Japonııa, Qyrǵyzstan, Mońǵolııa, Qytaı, Fılıppın, Shvetsııa, Tájikstan, Taıland, Túrikmenstan, AQSh, Ózbekstan jáne Qazaqstannyń 180-ge jýyq sportshysy qatysady. Olardyń 140-y er, 40-y áıel sportshylar.
Jarys erler arasynda 10 salmaq dárejesi men qyzdar arasynda 4 salmaq dárejesi (51, 57, 60, 75 kelige deıin) boıynsha ótedi.
Máselen, Taıland atynan 17 sportshy, Ózbekstannan 16, Úndistannan 14 sportshy qatysady. Bul elder - basqalaryna qaraǵanda eń kóp sportshy ákelgen memleketter. Kýbokqa qatysýshylardyń basym kópshiligi - ulttyq komandalardyń eń beldi boksshylary bolyp otyr. Mysaly, Ózbekstan komandasynda eki dúrkin Olımpıada chempıony Hasanbaı Dýsmatov pen Shahobıddın Zoırov, Taıland eliniń ókili, eki dúrkin álem chempıony Výttıchaı Masýk jáne 2015 jylǵy kontınent chempıony Chatchaı Býtdı, Fılıppın elinen ótken jylǵy QR Prezıdentiniń Kýbogi chempıony Karlo Palaam, Ońtústik-Shyǵys Azııa oıynynyń eki dúrkin chempıondary, álem chempıonatynda Danııar Eleýsinovpen kezdesken Charlı Sýarez pen Eýmır Marsıal kelgen.
Qazaqstan boks federatsııasy týrnır chempıondary men júldegerlerine aqshalaı syıaqy (1 oryn - 2 myń dollar, 2 orynǵa - 1 myń dollar, 3 orynǵa 500 dollar) beriledi.
Aqtyq jarys 10 maýsymda saǵat 13:00-de bastalady.
