QR Prezıdenti Kýba, Shvetsııa, Úndistan jáne Ulybrıtanııa elshilerine tabys tiledi
Memleket basshysy senim gramotasyn qabyldaý barysynda Qazaqstan Táýelsizdiktiń alǵashqy kúnderinen bastap, kóp vektorly syrtqy saıasat júrgizip kele jatqanyn, bul halyqaralyq qoǵamdastyqtyń barlyq múshesimen yntymaqtastyq baǵytyndaǵy dıalogty ornatýǵa baǵyttalǵanyn basa aıtty.
«Ulybrıtanııa álemdegi mańyzdy áriptesimizdiń biri ekeni sózsiz. Eki eldiń yntymaqtastyǵy ózara qurmet pen senimge berik negizdelgen. Búginde Ulybrıtanııa Qazaqstannyń iri ınvestorlarynyń jáne saýda áriptesiniń biri bolyp sanalady. Meniń 2015 jylǵy Londonǵa saparym osy jemisti yqpaldastyq pen eki eldiń qarym-qatynasyna tyń serpin berdi. Bizdiń saıası dıalogymyz eki jaqty formatta tabysty damýda», - dedi Qazaqstan Prezıdenti.
Elbasy Shvetsııa Rıksdagynyń (parlamenti) spıkeri Ýrban Alınnyń Qazaqstanǵa sapary ótken jyldyń mańyzdy oqıǵasyna aınalǵanyn aıtty. Sonymen qatar Qazaqstan-Shvetsııa saýda-ekonomıkalyq yntymaqtastyǵyn jandandyryp, saýda-sattyqtyń shaǵyn kólemin arttyrýymyz qajettigine basa nazar aýdardy.
«Biz Úndistandy Qazaqstannyń mańyzdy syrtqy saıası, saýda seriktesi retinde qaraımyz. Elderimiz halyqaralyq uıymdar aıasynda ózara belsendi is-qımyl jasap keledi. Úndistannyń Shanhaı Yntymaqtastyq uıymyna tolyq múshesi bolǵanyna qýanyshtymyz. Elderimiz bul uıymnyń jumysyna tyń serpin berip, mártebesin arttyrady dep senemiz», - dedi Elbasy.
QR Prezıdenti Shanhaı Yntymaqtastyq uıymy sammıti aıasynda Úndistan Premer-Mınıstri Marenda Monımen kezdesip, ekijaqty qarym-qatynastyń qazirgi máseleleri jan-jaqty talqylanǵanyn atap ótti. Sondaı-aq eki eldiń vedomstvolaryna saýda-ekonomıkalyq yntymaqtastyqtyń qarymyn kúsheıtý jóninde naqty tapsyrma berilgenin eske salyp ótti.
«Qazaqstan Kýba memleketimen ekijaqty yntymaqtastyq aıasyn keńeıtýge múddeli. Sońǵy jyldary Qazaqstan-Kýba qarym-qatynastary aıtarlyqtaı jandanyp kele jatyr. Men 2017 jyldyń sáýirinde alǵash ret Kýbaǵa resmı saparmen bardym. Kýba basshylyǵymen ótken kelissózder barysynda biz eki eldiń arasyndaǵy yntymaqtastyqtyń jańa perspektıvalaryn anyqtadyq. Elderimizdiń saýda ekonomıkalyq saıası yntymaqtastyǵyn nyǵaıtý úshin naqty jumystardy jalǵastyrý qajet», - dedi Nursultan Nazarbaev.
Sonymen qatar Qazaqstan Prezıdenti sheteldik dıplomattardyń Astanadaǵy qyzmetteriniń qyzyqty ári jemisti bolýyna tilektes ekenin bildirdi.
«Mıssııalaryńyz tabysty bolyp, memleketterimizdiń arasyndaǵy qarym-qatynastarymyzdy jan-jaqty damyta túsedi dep oılaımyn. Qazaqstanda ótken kúnderińiz ózderińiz úshin de jaqyndaryńyz úshin de jaıly bolsyn. Ol jaǵynan bizdiń mınıstrlik te, Úkimet te barlyq jaǵdaıdy jasaıdy. Sizderge tabys tileımin», - dep túıindedi sózin Elbasy.
