QR Prezıdenti konkýrstyq irikteý negizinde mansaptyq ilgerileýdiń mańyzdy ekenin atap ótti
Keńeske Premer-Mınıstr B.Saǵyntaev, Prezıdent Ákimshiliginiń basshysy Á.Jaqsybekov, Ulttyq bank tóraǵasy D.Aqyshev, Úkimet músheleri men memlekettik organdar basshylary qatysty.
Qazaqstan Prezıdenti «100 naqty qadam» ult josparynyń iske asyrylýy zańnyń ústemdigi qaǵıdatyn nyǵaıtýǵa, memlekettik qyzmet satylarynan ótý júıesin jetildirýge, bıznestiń damýyna jaǵdaı jasaýǵa, qoǵamdyq turaqtylyqty nyǵaıtýǵa, sondaı-aq azamattar aldynda esep beretin ashyq Úkimet qalyptastyrýǵa baǵyttalǵanyn atap ótti.
- Bul bes tarmaqtyń oryndalýy Qazaqstannyń damyǵan 30 el qataryna qosylý kezeńi bolyp sanalady, - dedi Nursultan Nazarbaev.
Elbasy memlekettik qyzmetshilerdi qyzmet nátıjeleri boıynsha kótermeleýdiń bonýstyq júıesine kóshýdiń mańyzdylyǵyn, Ádep kodeksiniń múltiksiz oryndalý kerektigin, ózge óńirge qyzmet aýystyrý barysynda memlekettik qyzmetkerlerdi jekeshelendirýge jatpaıtyn qyzmettik baspanamen qamtamasyz etý isin jandandyrý qajettigin aıtty.
Memleket basshysy konkýrstyq irikteý negizinde mansaptyq ilgerileýdiń mańyzdy ekenine toqtalyp ótti.
- Tómengi laýazymdaǵy memlekettik qyzmetkerdiń konkýrs boıynsha ilgerileýi merıtokratııa qaǵıdatyn nyǵaıtýdyń qazirgi tıimdi tetigi otyr, - dedi Qazaqstan Prezıdenti.
Sonymen birge, Nursultan Nazarbaev quqyq qorǵaý organdaryna qyzmetke qabyldaý barysynda konkýrstyq rásimderdi qoldaný qajettigine nazar aýdardy.
- Polıtsııanyń elimizde qalyptasqan kelbeti ózgerýge tıis. Qyzmetkerler azamattardyń senimine ıe bolyp, olardyń qyzmeti eń aldymen halyqqa kómek kórsetýge baǵyttalýǵa tıis, - dedi Elbasy.
Budan bólek, Memleket basshysy jergilikti polıtsııa qyzmetiniń quzyretin belgilep, olardyń eseptiligine qatysty elimizdiń quqyq qorǵaý organdaryn jańǵyrtý máselelerin qosymsha taǵy pysyqtaýdy tapsyrdy.
Sondaı-aq, Qazaqstan Prezıdenti «Astana» halyqaralyq qarjy ortalyǵy janynan Halyqaralyq arbıtrajdyq ortalyq qurý jónindegi jumystardy tezdetý kerektigin aıtty.
Nursultan Nazarbaev sheteldik ınvestorlardy tartýdyń, sondaı-aq respýblıka boıynsha óndiris kúshterin júıeli túrde bólýdiń aıryqsha máni bar ekenin atap ótti.
Budan bólek, Elbasy áleýmettik medıtsınalyq saqtandyrý júıesin engizý jóninde júrgizilip jatqan reformalardyń mańyzdylyǵyna toqtaldy.
- Men osy máseleniń sheshimine qatysty erekshe túsinistik tanytqandaryńyzdy qalaımyn. Qazirgi kezde qıyndyqtar bar ekenine qaramastan, bul - óte progressıvti baǵyt. Halyq arasynda tıisti daıyndyq ótkizip, túsindirý jumystaryn júrgizý qajet, - dedi Memleket basshysy.
Keıbir qadamnyń iske asyrylýyn talqylaý barysynda Qazaqstan Prezıdenti Úkimet pen basqa da múddeli organdar jumysyndaǵy kemshin tustardy atap ótip, bul baǵyttaǵy jumysty jandandyrýdy tapsyrdy.
Sondaı-aq, Elbasy Týrıstik salany damytýdyń 2020 jylǵa deıingi tujyrymdamasyn ishki týrızmniń basymdyǵy bar baǵyttaryn eskere otyryp jańartýdy tapsyrdy.
- Óńirlik týrızmdi ilgeriletý úshin barlyq kúsh-jigerdi jumyldyrý qajet. Bul ekonomıkamyz úshin de, qazaqstandyq birtektilik pen birlikti nyǵaıtý úshin de mańyzdy, - dedi Memleket basshysy.
Qazaqstan Prezıdenti «Úkimet - azamattar úshin» baǵdarlamasy arqyly halyqqa kórsetiletin qyzmetter sapasyn arttyrý jónindegi jumystardy da odan ári jetildirý qajettigin atap ótti.
Nursultan Nazarbaev keńeske qatysýshylarǵa Ult josparynyń barlyq baǵyty boıynsha jumysty ilgeriletip, baqylaý júrgizýdi kúsheıtý qajettigin aıtty, sondaı-aq basshylardyń derbes jaýapkershiligi jóninde eskertti.
Sońynda Memleket basshysy Qazaqstannyń ekonomıkasy úshin mańyzdy jetistikterge qol jetkizý jáne elimizdiń ár azamatynyń ál-aýqatyn arttyrý Ult jospary men basty memlekettik baǵdarlamalardyń túpki| maqsaty bolyp sanalatynyn aıtty.
