QR Prezıdenti QHA-nyń birqatar múshelerine táýelsizdikti, ulttyq birlikti nyǵaıtýǵa qosqan úlesi úshin medaldar tapsyrdy
Sessııa jumysyna Qazaqstan halqy Assambleıasynyń músheleri, Parlament depýtattary, Úkimet músheleri, saıası partııalar, dinı konfessııalar, dıplomatııalyq mıssııalardyń basshylary, saılaýdy baqylaý jónindegi qoǵamdyq komıssııa ókilderi, ǵylymı jáne shyǵarmashylyq zııaly qaýym, buqaralyq aqparat quraldary qatysty.
Memleket basshysy óz baıandamasynda, turaqtylyq, birlik, jańǵyrý - qazaqstandyq qoǵamnyń negizgi qundylyqtary dep atap kórsetti.
«Turaqtylyq - Táýelsiz Qazaqstannyń damýynyń bazalyq sharty boldy jáne bola beredi. Qazaqstandyq turaqtylyq - bul 700-den astam jańa mektep, 750-ge jýyq jańa emhana, aýrýhana men medıtsınalyq ortalyqtar. Bul jańa páterler men úılerde qonys toıyn toılaǵan bir jarym mıllıon qazaqstandyqtar. 2020 jylǵa deıin biz bir jarym mıllıon qazaqstandyqty jumysqa ornalastyrýdy josparlap otyrmyz. 2014 jylǵa deıingi Indýstrııalandyrý kartasy boıynsha 100 jańa óndiris orny ashylatyn bolady», - dedi Nursultan Nazarbaev.
Memleket basshysy «Bıznes-2020» Jol kartasy tabysty oryndalyp jatqanyn erekshe atap ótti. Kásipkerlikti memleket qoldaıtyn mundaı baǵdarlama álemniń eshbir elinde joq. Ózge mańyzdy joba - «Halyqtyq-ІRO» baǵdarlamasy. Sondaı-aq Qazaqstan Prezıdenti otandyq densaýlyq saqtaýdy damytýǵa toqtaldy. Eń zamanaýı jabdyqtarmen jabdyqtalǵan poıyzdar arqyly 200-den astam shalǵaıdaǵy eldi mekenderdiń 100 myńnan astam turǵyndaryna medıtsınalyq kómek kórsetildi.
«Jalpy, búginde qazaqstandyqtardyń 87 paıyzy turaqtylyqtyń arqasynda áleýmettik kóńil-kúıleri jaqsy jáne bolashaqqa degen senimderi joǵary ekenin atap ótken. Qazirgi ýaqytta kúlli elim jahandyq daǵdarystyń jańa tolqynyn alańdaýshylyqpen kútýde. Tipti, damyǵan elderde ekonomıkalyq qıynshylyqtar týyndaýda, áleýmettik shyǵystar qysqartylýda, memlekettik qaryz óse túsýde. Al biz Qazaqstanda jańa zaýyttardy, fabrıkalardy ashýdamyz, shaǵyn nesıeler berýdemiz, zeınetaqy, járdemaqy men eńbekaqy kólemi artýda. Bul - kez kelgen jahandyq daǵdarysqa daıyndyq», - dedi Nursultan Nazarbaev.
Bizdiń qoǵamymyzdyń basty qundylyǵy - qazaqstandyqtardyń birligi bolyp tabylady. Bul Qazaqstannyń alǵa qadam basýynyń baǵa jetpes kepili.
«Búginde qazaqstandyqtardyń 92 paıyzy eldegi etnosaralyq jaǵdaıdy joǵary baǵalaıdy. Barsha qazaqstandyqtardyń maqsat-múddesi ortaq. Ony bolyp ótken prezıdenttik jáne parlamenttik saılaýlardyń nátıjeleri taǵy da aıqyn kórsetti. Saılaýshylardyń basym kópshiligi «Nur Otan» partııasyn qoldady. Qazaqstandyq birliktiń negizi - azamattardyń quqyǵy men bostandyǵynyń teńdigi. Búgingi kúni bizdiń qoldanystaǵy zańnamamyzǵa sáıkes Qazaqstanda sóz bostandyǵy tolyq kólemde qamtamasyz etilgen. Bul saladaǵy istiń jaǵdaıy TMD, EýrAzEQ, ShYU syndy áriptesterimizden áldeqaıda jaqsy. Shyndyǵynda, biz baspasóz qyzmetin qamtamasyz etýde eýropalyq standarttarǵa edáýir jaqynbyz», - dep atap kórsetti Memleket basshysy.
Jańǵyrýdy Qazaqstan Prezıdenti jahandyq damýdyń ımperatıvi retinde atady. Búginde álemde ekonomıkanyń damýy, adamdardyń ómir súrý deńgeıi jaqsarýy úshin adamzat aldyna tańǵajaıyp múmkindikter ashatyn tehnologııalyq revolıýtsııa pisip jetilýde. Barsha qazaqstandyqtarǵa ındýstrıalyq-ınnovatsııalyq damý, áleýmettik jańǵyrý, óńirlik jáne jahandyq yqpaldastyqtyń tarıhı taǵdyrsheshti mindetterin túsiný mańyzdy.
«Búginde kez kelgen qazaqstandyq etnostyq nemese dinı ustanymyna qaramastan óz eliniń teń quqyly azamaty sanalady. Qazaq halqy men memlekettik til - damyp kele jatqan qazaqstandyq azamattyq qoǵamdy biriktirýshi ıadro retinde yqpal etetin bolady. Bul úderis obektıvti túrde júrgizilýde. Memlekettik buqaralyq aqparat quraldarynyń 70 paıyzy qazaq tilinde jaryq kóredi. Qazaq tilinde bilim beretin mektepterde oqyp jatqan oqýshylardyń sany 63 paıyzdy quraıdy. Biz 2020 jylǵa qaraı qazaqstandyqtardyń 95 paıyzy memlekettik tildi meńgerýine qol jetkizý mindetin qoıdyq. Men til týraly másele saıasat máselesi emes ekenin birneshe ret aıttym. Konstıtýtsııanyń jáne tıisti zańdardyń qabyldanýymen saıası sheshim áldeqashan qabyldanǵan. Til týraly másele saıası saýdagerlik quraly bola almaıdy», - dep atap ótti Qazaqstan Prezıdenti.
Sonymen qatar, sessııa barysynda QHA músheleri men sessııa qonaqtary sóz sóıledi. Atap aıtqanda, Astana qalasyndaǵy «Zlata» bolgar etno-mádenı ortalyǵynyń jetekshisi O.Andrıevskaıa búginde Qazaqstan halqy Assambleıasy strategııalyq mindetterdi sheshýge atsalysatyn áleýetti qoǵamdyq ınstıtýt ekendigin aıtty.
«Al Qazaqstan Táýelsizdiginiń 20 jylynda eń qarqyndy damyǵan elderdiń qataryna qosyldy. Áleýmettik saıasat nyǵaıýda, júzdegen bilim men medıtsınalyq mekemeler salyndy. Onyń jarqyn mysaly - ótken jyly ǵana elimiz boıynsha 1600-den astam mektepke deıingi balalar mekemeleri ashyldy. Búginde óz azamattaryn emdeýge orasan bıýdjettik qarajat bólip otyrǵan birde-bir el joq. Biz muny maqtan tutamyz. Qazaqstan XXI ǵasyrda etnosaralyq qatynastardy tıimdi basqara alatyn, beıbitshilikke, kelisimge jáne onda turyp jatqan etnoastardyń dostyǵyna qol jetkize alatyn memleketke aınalǵanyn naqty dáleldedi», - dedi O.Andrıevskaıa.
Qazaqstan halqy Assambleıasynyń Qaraǵandy oblysyndaǵy ǵylymı-saraptama tobynyń tóraǵasy V.B.Molotov-Lýchanskıı bizdiń elimiz qıyn jyldardyń ózinde jaǵdaıdyń shıelenisip ketýine jol bermegenin aıtyp ótti.
«21 ǵasyrdaǵy Qazaqstan - beıbitshil el. Álemniń kóptegen elinde óndiris toqtap jatyr. Al bizde tek sońǵy eki jyl ishinde 400 jańa ındýstrııalyq joba iske qosyldy. Etnosaralyq toleranttylyq pen qoǵamdyq kelisimniń qazaqstandyq modeli úlken qyzyǵýshylyq týdyryp otyr. Tek 2011 jyly Assambleıaǵa 16 memlekettiń ókilderiniń kelýi sonyń aıqyn dáleli bolyp tabylady», - dedi V.Molotov-Lýchanskıı.
«LADE» (Chehııa) bilim damytý halyqaralyq qaýymdastyǵynyń prezıdenti L.Sheıko Qazaqstanda adam damýy úshin barlyq jaǵdaı jasalǵanyn, adamǵa, onyń bolashaǵyna kóńil bólingenin atap kórsetti.
«Qazaqstannyń 20 jyl ishindegi tájirıbesi orasan zor. Álem Sizderdiń elderińizdiń damý qarqynyna qyzyǵýshylyqpen qaraıdy. Men Bilim damytý halyqaralyq qaýymdastyǵyn basqaramyn. Bilim toleranttyq tanymdy qalyptastyrýǵa tikeleı baılanysty. Jańa qazaqstandyq bilimniń, ozyq ınnovatsııalyq oılaýdyń sımvoly Nazarbaev Ýnıversıteti bolyp otyr. Búginde bul jaıynda Qazaqstannan tys jerlerde, sonyń işinde Eýropada kópten beri biledi. Taıaý bolashaqta Chehııa, Frantsııa, Germanııa jáne ózge de elderdiń stýdentteri osyndaı tamasha joǵary oqý ornynda oqýdy abyroı sanaıtynyna senemin», - dedi L.Sheıko.
Odan keıin, jazýshy S.Elýbaı sóz alyp: «Siz «Birlik bar jerde tirlik bar» deýmen kelesiz. Osy suńǵyla saıasat arqasynda Táýelsiz Qazaqstan óz tarıhynda ultaralyq qaq-soqtardan aman ótti. Qazaqstan halqy Assambleıa shańyraǵy astyna birikti, qazaq ultynyń tóńiregine toptasty. Assambleıa jumysyna biz aralasqan sońǵy eki-úsh jyldyń ózinde bir syn saǵattar boldy. Assambleıa músheleri sol syndardan bir atanyń balasyndaı abyroımen ótti. Másele sheshýde maıtalmandyq tanytty», - dep atap ótti.
Jambyl oblystyq ishki ister departamentiniń jol polıtsııasynyń ınspektory T.Býıýkıdı Qazaqstandy turaqtylyq jáne tynyshtyq mekeni dep atady.
«Bala kezimizde «Jeruıyq» sóziniń mánin túsine bermeıtinbiz. Endi men onyń mánin bilemin. Biz Qazaqstanda ǵana ózimizdi bárimen teń sanaımyz, tek osy berekeli jerde ǵana biz úshin bárine jol ashyq. Búgin osy bıik minberden men: «Qazaqstanda turyp jatqanymdy maqtan etemin!» degim keledi. Bul meniń Otanym, men úshin ǵajap meken!», - dedi T.Býıýkıdı.
«Suńqar» arnaıy maqsattaǵy otrıadtyń shtýrmovıgi B.Dúısenov óz sózinde azamattardyń qaýipsizdigi, analar ben ákelerdiń tynyshtyǵy, bizdiń balalarymyzdyń baqyty qamtamasyz etilgenin senimmen aıtty.
Semeı qalasyndaǵy orys áleýmettik-mádenı ortalyǵynyń tóraǵasy M.Panın Semeı polıgonyn jabý jáne ıadrolyq qarýdan bas tartý týraly sheshimniń mańyzy zor bolǵanyn erekshe atap ótti.
«Qazaqstan ózin halqynyń sanyna qaramastan álemniń damýyna belsendi yqpal etip otyrǵan memleket retinde dáleldedi. Búginde Qazaqstan kez kelgen elge ıadrolyq tehnologııany beıbit maqsatta paıdalaný quqyǵyn myǵym qorǵaı alady jáne «beıbit atomǵa» jaýapty qózqarastaǵy qaǵıdattardy ázirleý jóninde kóshbasshyǵa aınaldy», - dedi M.Panın.
Sonymen qatar, sessııada «Jeltoqsan-86» respýblıkalyq birlestiginiń tóraǵasy G.Júnis pen Qazaqstan orys, kazak jáne slavıan birlestikteri úılestirý keńesiniń tóraǵasy ıÝ.Zaharov sóz sóıledi.
Sessııa sońynda, Qazaqstan Prezıdenti 1 mamyr - Qazaqstan halqynyń birligi merekesin merekeleý aıasynda táýelsizdikti, ulttyq birlikti nyǵaıtýǵa, mádenıetaralyq dıalog pen qazaqstandyq patrıotızmdi damytýǵa qosqan eleýli úlesi úshin QHA-nyń birqatar múshelerin «Qazaqstan halqy Assambleıasynyń qoǵamdyq «Birlik» altyn medalimen» marapattady.
