QR Prezıdenti: Kez kelgen daǵdarys - bárin tártipke keltirýdiń múmkindigi
ATYRAÝ-ASTANA. QazAqparat - Kez kelgen daǵdarys - bárin tártipke keltirýdiń múmkindigi, dedi Elbasy Nursultan Nazarbaev Atyraý, Aqtóbe, Batys Qazaqstan men Mańǵystaý oblysy ákimderimen ótken jınalys kezinde.
Memleket basshysy búginde búkil álem daǵdarys yqpalyn sezinip otyrǵanyn aıtty, dep habarlady Aqordanyń baspasóz qyzmetinen.
«Munda turǵan qorqynyshty eshteńe joq. Biz kapıtalıstik álemde ómir súrip jatyrmyz. Bul júıede udaıy ósim bolýy múmkin emes, ósimnen keıin ylǵı da quldyraý bolady. Álbette, daǵdarys yqpaly zor bolyp otyr: bir jaǵynan energııa tasymaldaýshy ónimder baǵasy quldyraýda, ekinshi jaǵynan bizdiń negizgi saýda seriktesimiz - Reseıge qatysty sanktsııalar óz yqpalyn tıgizýde. Biraq kez kelgen daǵdarys - bárin tártipke keltirýdiń de múmkindigi. Máselen, biz nashar isteıtin kásiporyndar máselesin ylǵı keıinge qaldyryp keldik. Mundaı nysandar búkil álemde bankrottyqqa ushyraıdy, burynǵy menshik ıesiniń ornyna basqasy keledi», - dedi Nursultan Nazarbaev.
Memleket basshysy óńir basshylaryn tıimsiz jumys isteıtin jáne básekege qabiletsiz kásiporyndardyń bolashaǵy joq ekenin eskerýge shaqyrdy.
«Men EAEO-ǵa jáne DSU-ǵa kirer kezde bizdiń kásipkerlerge básekege qabilettiligin arttyrý qajettigin talaı ret aıttym. Endi kedergilerdi azaıtyp, eńbek ónimdiligin kóterý kerek», - dedi Qazaqstan Prezıdenti.
Nursultan Nazarbaev Sochıde ótken XII óńiraralyq yntymaqtastyq forýmy týraly da aıtty.
«Biz Reseımen birge aýyl sharýashylyǵyn damytý keleshegin talqyladyq. Búginde agroónerkásip sektorynda reseılikter bizden ozyp tur. Olardyń eńbek ónimdiligi 1,5 ese joǵary, sóıte tura Reseı kanadalyqtardan 8-10 ese qalys qalyp keledi. Bizge osy baǵytta júrý kerek. Búgin men optıkalyq talshyqty kabel óndiretin kásiporynda boldym, onda bir adamǵa shaqqanda 80 myń dollardyń ónimi shyǵarylady. Eger shyǵaratyn ónimi shyǵyndardy aqtamaıtyn bolsa, ondaı óndiristiń qajeti joq», - dedi Memleket basshysy.
