QR Prezıdenti Qazaqstandy álemdik kóshbasshylardyń qataryna kirgizbek
ASTANA. QazAqparat - QR Prezıdenti Nursultan Nazarbaev Qazaqstandy bolashaq áleminde kóshbasshylar deńgeıine deıin jetkizýge nıetti. Bul týraly Elbasy ulyqtaý rásiminde málim etti.
«Bizdiń aldymyzda túbegeıli úlken mindet tur, ıaǵnı bizdiń memlekettik kemeni sýǵa batpaıtyndaı etý. Sondyqtan da aldaǵy jyldardyń maqsaty - Qazaqstandy nyǵaıtyp, álemdegi tolqýlarǵa qaramastan, aldyńǵy qatarly 30 memlekettiń qataryna senimdi kirý», - dep toqtalǵan Prezıdent, osy oraıda saılaýaldy tuǵyrnamasy bolǵan bes ınstıtýtsıonaldy reformalardy usynǵanyn atap ótti. Memleket basshysy 26 sáýirdegi saılaýdyń nátıjesin reformalardy dereý ótkizý boıynsha halyqtyń mandaty retinde qabyldap otyrǵanyn jetkizdi.«Men ózimniń erkimdi, tabandylyǵymdy, sondaı-aq memlekettik apparatty jáne barsha qoǵam men qazaqstandyqtardyń kúsh-jigerin osy reformalardy oryndaýǵa shoǵyrlandyrýǵa nıettimin», - dedi N. Nazarbaev.
