QR Prezıdenti: Qazaqstan men Túrkııa terrorızmge qarsy úzildi-kesildi toıtarys berýge kelisti
ASTANA. QazAqparat - Ankarada Elbasy Nursultan Nazarbaev Túrkııa Respýblıkasynyń Prezıdenti Redjep Taııp Erdoganmen kelissózder qorytyndysy boıynsha birlesken baspasóz máslıhatyn ótkizdi, dep habarlaıdy Aqordanyń baspasóz qyzmeti.
Nursultan Nazarbaev ekijaqty yntymaqtastyqtyń, sondaı-aq, óńirlik jáne halyqaralyq kún tártibiniń máseleleri qaralǵan kezdesýlerdiń jemisti ótkenine toqtaldy.
Túrkııa - Qazaqstannyń eń jaqyn ári senimdi saıası jáne ekonomıkalyq áriptesteriniń biri. Búginde ortaq tarıh pen rýhanı muraǵa negizdelgen qarym-qatynasymyz óristeı túsýde. Baılanystarymyz birte-birte ilgerilep, qazir strategııalyq sıpatqa ıe bolyp otyr. Qazaqstan baýyrlas túrik halqyna únemi tolyq qoldaý kórsetedi jáne árqashan qol ushyn berýge daıyn. Bul sapar eki eldiń qarym-qatynastaryn odan ári nyǵaıta túsýge septigin tıgizedi dep senemin, - dedi Qazaqstan Prezıdenti.
Memleket basshysy kelissózder barysynda saýda-ekonomıkalyq jáne ınvestıtsııalyq salalardaǵy ózara is-qımyl boıynsha birqatar ýaǵdalastyqqa qol jetkizilgenin de atap ótti.
- Qazir elimizde túrik kapıtalynyń qatysýymen 1600-den astam kásiporyn jumys isteıdi. Túrik bıznesiniń ókilderi jańa elordamyzdyń qurylysyna belsene atsalysty. Túrik kompanııasynyń ókilderi búginge deıin elimizde 20 mıllıard dollar kóleminde merdigerlik jumystar atqaryp, 460 nysan paıdalanýǵa berildi. Elderimizdiń arasyndaǵy taýar aınalymy ótken jyly 2 mıllıard dollardy qurady, - dedi Nursultan Nazarbaev.
Sonymen qatar, Qazaqstan Prezıdenti R.Erdoǵannyń ótken jylǵy Astanaǵa sapary aıasynda qabyldanǵan «Jańa sınergııa» birlesken ekonomıkalyq baǵdarlamasynyń mańyzdylyǵyna toqtaldy.
- Bizdiń mindetimiz - ózara taýar aınalymyn 10 mıllıard dollarǵa jetkizý. Baǵdarlama aıasynda jalpy quny shamamen 813 mıllıon dollardy quraıtyn 20 ınvestıtsııalyq jobany iske asyrý qarastyrylǵan. Túrkııanyń ınfraqurylymy damyǵan mańyzdy tranzıttik el ekenin eskerip, men baýyrlas túrik halqyn «Nurly Jol» baǵdarlamasyn júzege asyrýǵa atsalysýǵa shaqyrdym. Osyǵan oraı, Qazaqstan-Túrkııa ındýstrııalyq aımaqtaryn qurý jumystary asa mańyzdy. Bul qadamdar eki eldiń ekonomıkalyq áleýetiniń ári qaraı damýyna serpin beredi, - dep atap ótti Memleket basshysy.
Nursultan Nazarbaev halyqaralyq turaqtylyqty qamtamasyz etý máselesi boıynsha jappaı kúsh jumyldyrýdyń mańyzdylyǵyna da nazar aýdaryp, bizdiń elimizdiń Birikken Ulttar Uıymynyń Qaýipsizdik Keńesiniń 2017-2018 jyldardaǵy turaqty emes músheligine ótýine qoldaý kórsetkeni úshin Túrkııaǵa alǵys aıtty.
- Jahandyq syn-synaqtar men qaýip-qaterler arta túsken almaǵaıyp zamanda Qazaqstan men Túrkııa álemdik qaýipsizdik pen turaqtylyqty qamtamasyz etý úshin kúsh jumyldyrýǵa daıyn. Osy oraıda biz HHІ ǵasyrdyń basty keseli - terrorızmge qarsy úzildi-kesildi toıtarys berýge kelistik. Elderimizdiń arasyndaǵy áskerı jáne áskerı-tehnıkalyq saladaǵy yntymaqtastyq ornyqty damýda, - dedi Memleket basshysy.
Qazaqstan Prezıdenti mádenı-gýmanıtarlyq saladaǵy ekijaqty yntymaqtastyq únemi ilgerilep kele jatqanyn atap ótti.
- Kelesi jyly Astanada «Bolashaq energııasy» taqyrybymen «EKSPO-2017» halyqaralyq kórmesi ótedi. Bul aýqymdy shara balamaly energetıka salasyndaǵy ınnovatsııa máselesine arnalǵan. Men búgin Túrkııa basshylyǵyn, bıznes ókilderin jáne baýyrlas túrik halqyn osy sharaǵa qatysýǵa shaqyrdym, - dedi Nursultan Nazarbaev.
Qazaqstan Prezıdenti sóziniń sońynda Qazaqstan-Túrkııa qarym-qatynastarynyń ári qaraı nyǵaıtýdyń áleýeti zor ekenine toqtaldy.
Sondaı-aq, bizdiń respýblıkamyzdaǵy qazaq-túrik lıtseıleriniń jumysyna qatysty másele de qaralyp, taraptar ózara túsinistik tapty.
R.Erdoǵan Qazaqstan Prezıdentine Túrkııa men Reseıdiń qarym-qatynasyn qalypqa keltirýge kúsh salǵany jáne tarıhy sapary úshin taǵy da alǵys aıtyp, túrik halqy úshin kúrdeli bolyp otyrǵan kezeńde mundaı qoldaýdyń der kezinde kórsetilip otyrǵanyna toqtaldy. Sonymen qatar ol Nursultan Nazarbaev Túrkııadaǵy áskerı tóńkeris jasaý áreketinen keıin bul elge kelgen alǵashqy memleket basshysy ekenin atap ótti.
