QR Prezıdenti: Qazaqstan men Ózbekstan arasynda sheshimin tappaǵan másele joq
TAShKENT. ÓzA-QazAqparat - Qazaqstan men Ózbekstan arasynda syndarly dıalog arqyly sheshilmegen másele joq. Bul jaıynda Ózbekstannyń «ÝzA» ulttyq aqparat agenttigine suhbat bergen QR Prezıdenti Qasym-Jomart Toqaev aıtty, dep habarlaıdy QazAqparat.
«Qazaqstan men Ózbekstan táýelsizdiktiń alǵashqy kúnderinen-aq kúrdeli kezeńderde bir-birine qoldaý kórsetip, bir-biriniń tabysyna shynaıy qýanyp, tatý-tátti ómir súrip keledi. Biz myǵym ári úılesimdi qarym-qatynas ornattyq. Oǵan bir maqsat - eki eldiń órkendeýi negiz bolyp otyr. Memleketterimiz arasyndaǵy strategııalyq seriktestiktiń nyǵaıýynda Qazaqstannyń Tuńǵysh Prezıdenti Nursultan Ábishuly Nazarbaev pen Ózbekstan Prezıdenti Shavkat Mıromonuly Mırzıeev jetekshi ról atqardy. Ult kóshbasshysy jaqyn kórshilermen qarym-qatynasty damytýǵa árdaıym aıryqsha nazar aýdaryp keledi. Sondyqtan sizderdiń elderińiz Qazaqstannyń syrtqy saıasatyndaǵy basym baǵyt sanatyna kiredi. Biz qos halyqty odan ary jaqyndata túsý baǵytyn jalǵastyra beremiz», - degen QR Prezıdenti suhbatynda.
Memleket basshysy qazirgi basty mindet - saýda-ekonomıkalyq baılanysty keńeıtý jáne shekara mańy yntymaqtastyǵyn tereńdetý ekendigin basa aıtty.
«Bizdiń memleketterimiz bul salalarda zor múmkindikke ıe. Eki el úkimetterine 2020 jylǵa qaraı ózara saýda kólemin 5 mlrd dollarǵa deıin jetkizý mindeti júktelgen», - dedi Q.Toqaev. Sonymen qatar QR Prezıdenti ınvestıtsııalyq saladaǵy, ónerkásiptik kooperatsııadaǵy, birlesken óndiristi damytýdaǵy jemisti ári údemeli yntymaqtastyqtyń qolda bar mysaldary eki jaqtyń da ekonomıkalyq ózara is-qımyldy tereńdetýge umytylysyna jaýap bere alatynyn atap ótken.
«Kóliktik-tranzıttik saladaǵy seriktestiktiń keleshegi zor. Teńizge shyǵar joly joq Qazaqstan úshin de, Ózbekstan úshin de tranzıttik ınfraqurylymdy jetildirý jáne ózge eldermen kóliktik kooperatsııany damytý - birinshi kezekti mindet sanalady. Nur-Sultan men Tashkenttiń qaýipsizdik salasyndaǵy ózara is-qımyldy dáıekti túrde nyǵaıtýy - ózara senim kórsetkishi. Terrorızm, dinı ekstremızm, qarý-jaraqtyń zańsyz saýdasy, uıymdasqan qylmys, zańsyz kóshi-qon men esirtki tasymaly syndy óńirlik problemalar barlyǵymyzǵa ortaq. Sondaı-aq qaýipsizdik táýekelin kúsheıte túsetin Aýǵanstandaǵy ahýal da aıtarlyqtaı alańdaýshylyq týǵyzady. Munyń barlyǵy da bizden júıeli, kelisilgen aldyn alý sharalaryn talap etedi. Sondyqtan Qazaqstan men Ózbekstan qazirden-aq eki eldiń quqyq qorǵaý organdary men arnaıy qyzmetteriniń arasyndaǵy baılanysty jolǵa qoıýda. Sý problemasynda da yntymaqtastyq máselesi aıryqsha mańyzǵa ıe. Sý qatynastarynyń barlyq baǵyttary boıynsha jumys toptarynyń otyrystaryn, óńirdegi ózge de seriktestermen tyǵyz úılestirý jumystaryn turaqty túrde ótkizetinimiz qýantady», - dedi Memleket basshysy.
Sondaı-aq, Q.Toqaev mádenı-gýmanıtarlyq baılanystardy odan ary nyǵaıtýǵa basa nazar aýdarylatynyn jáne muny eki eldiń de halqy oń qabyldaıtynyn sóz etti.
«Qazaqstan men Ózbekstan arasynda syndarly dıalog jolymen sheshilmeýi múmkin emes máselelerdiń is júzinde joqtyǵy - úlgi bolarlyq jaıt. Qos el arasyndaǵy qarym-qatynas ekijaqty ózara is-qımyldyń tabysty ári tıimdi modeli jáne búkil ortaazııalyq óńirdiń turaqtylyǵy, qaýipsizdigi men nyq damýynyń mańyzdy faktory sanalady. Menińshe, Nur-Sultan men Tashkenttiń aldynda turǵan uqsas maqsattar men mindetter bizdiń keń aýqymdy yntymaqtastyǵymyzdy odan ary damytý úshin qýatty yntalandyrýshy qyzmetin atqarady», - dedi QR Prezıdenti.
