QR Prezıdenti: Qazaq-túrik qatynastary dostyq, ózara túsinistik rýhynda damyp keledi
NUR-SULTAN. QazAqparat - Qazaqstan Prezıdenti Qasym-Jomart Toqaev Túrkııa Respýblıkasynyń Syrtqy ister mınıstri Mevlıýt Chavýshoglýdy qabyldady, dep habarlaıdy Aqordanyń baspasóz qyzmeti.
Kezdesý barysynda Memleket basshysy qazaq-túrik qatynastarynyń dostyq, ózara túsinistik pen yntymaqtastyq rýhynda qarqyndy damyp kele jatqanyn atap ótti.
- Tarıhı tamyry tereń qatynastarymyz óte jaqsy. Qazaqstannyń Tuńǵysh Prezıdenti - Elbasy Nursultan Nazarbaev qarym-qatynasty nyǵaıtýǵa óziniń zor úlesin qosty. Búginde elderimiz arasyndaǵy taýar aınalymy 2 mıllıard dollarǵa jýyqtady. Qazaqstan naryǵynda kóptegen túrik kompanııalary tabysty eńbek etýde. Halyqaralyq kún tártibindegi aýqymdy máselelerge, atap aıtqanda kópjaqty uıymdar aıasyndaǵy ózara is-qımyldarǵa qatysty pikirlerimiz ortaq, - dedi Qasym-Jomart Toqaev.
M.Chavýshoglý Qazaqstan Prezıdentine alǵys aıtyp, eki el arasyndaǵy strategııalyq seriktestiktiń konstrýktıvti sıpatyn atap ótti.
