QR Prezıdenti qaı elderdiń basshylarymen kezdesti
NUR-SULTAN. QazAqparat - Bıyl QR Prezıdenti Qasym-Jomart Toqaev 100-ge jýyq halyqaralyq kezdesý ótkizdi. Bul týraly búgin Aqordada ótken brıfıngte QR Prezıdentiniń baspasóz hatshysy Berik Ýálı aıtty, dep habarlaıdy QazAqparat tilshisi.
«Qazaqstan Prezıdenti Qasym-Jomart Toqaev halyqaralyq jáne óńirlik qaýipsizdikti qamtamasyz etý, memleketaralyq baılanystar men ózara yntymaqtastyqtardy nyǵaıtý maqsatynda Reseı Prezıdenti V.Pýtınmen, QHR Tóraǵasy Sı Tszınpınmen, AQSh Prezıdenti Donald Tramppen jáne Germanııa kantsleri Angela Merkelmen kezdesti. Sondaı-aq, Armenııa, Belarýs, Bolgarııa, Grýzııa, Iran, Iordanııa, Katar, Lıýksembýrg, Qyrǵyzstan, Vengrııa, Moldova, Ońtústik Koreıa, Ózbekstan, Polsha, Sıngapýr, Tájistan, Túrikmenstan, Ýkraına, Fınlıandııa, Shveıtsarııa memleketteriniń basshylarmen júzdesti», - dedi QR Prezıdentiniń baspasóz hatshysy.
Munan bólek, onyń dereginshe, Prezıdent Elshilermen, sheteldik isker jáne saıası ortanyń halyqaralyq uıymdarynyń jetekshilerimen, sonyń ishinde BUU Bas hatshysy Antonıo Gýterıshpen, Eýropalyq keńes tóraǵasy Donald Týskpen jáne basqa da álemdik deńgeıdegi saıası tulǵalarmen 100-ge jýyq halyqaralyq kezdesý ótkizdi.
«Memleket basshysy 23 sheteldik Elshiden senim gramotalaryn qabyldady jáne Qazaqstannyń shetelderdegi 30 Elshisin taǵaıyndady. Sonymen qatar Qazaqstannyń 6 memlekettegi, atap aıtsaq, Bolgarııa, Latvııa, Portýgalııa, Serbııa, Slovakııa, Estonııadaǵy dıplomatııalyq mıssııalar Elshilik retinde qaıta quryldy. Nur-Sultan qalasynda 70 memlekettiń Elshiligi men 30 halyqaralyq uıym ókildigi bar solardyń barlyǵymen ótken aıdyń sońynda Aqordada kezdesý ótkizgenin bilesizder»,- dedi Berik Ýálı.
