QR Prezıdenti Qasym-Jomart Toqaev jemqorlyqpen kúrestiń jeti negizgi sharasyn atady
Birinshi - azamattardyń quqyǵyn qorǵaý. Men Konstıtýtsııaǵa sáıkes ultyna, dinine, múlik jaǵdaıyna qaramastan barlyq azamattar teń degen erejeni basshylyqqa alamyn. Eshkim de zańnan bıik emes. Qol astyndaǵy qyzmetkerlerdiń jemqorlyqqa qatysy bolsa, ortalyqta da, óńirlerde de birinshi basshylar tikeleı jaýap beredi. Sondyqtan, keshendi aldyn alý sharalaryn qolǵa alý qajet.
Ekinshi - memleket pen azamattyq qoǵam ınstıtýttarynyń konstrýktıvti áriptestigin qamtamasyz etý kerek. Óıtkeni jemqorlyqpen kúreste kúshtik sharalar azdyq etedi. Qoǵamda jemqorlyqqa múldem tózbeýshilik qalyptasýy shart. Barlyq memlekettik organdar osy baǵytta jumys isteý kerek. Ádilet mınıstrligi kópshiliktiń jemqorlyqqa qatysty quqyqtyq saýatyn arttyrý jumystaryn kúsheıtýi kerek. Bilim jáne ǵylym mınıstrligi de balalardy erte jastan jemqorlyqqa qarsy mádenıet negizderine baýlýdy qol alǵany jón.
Úshinshi - qoǵamdyq baqylaýdy kúsheıtý. Parlamenttiń, qoǵamdyq jáne úkimettik emes uıymdardyń, buqaralyq aqparat quraldarynyń belsendi qatysýy negizinde memlekettik sheshimderdiń ádildigin qamtamasyz etý kerek. Jer ýchaskelerin berý, balabaqshadan kezek alý sııaqty máselelerdiń bári de qoǵamdyq baqylaý negizinde júzege asýy shart. Bizde mundaı jumystar úshin quqyqtyq mehanızmder bar. Árbir memlekettik organda qoǵamdyq keńes jumys isteıdi. Alaıda, is júzinde olardyń jumysy kóńil kónshitpeı otyr. Azamattyq qoǵammen jumystaǵy tásilderdi túbegeıli ózgertý qajet. Memlekettik apparattyń jumysyn azamattardyń talabyna saı baǵyttaý kerek.
Tórtinshi shara - bıýdjettik saıasattyń ashyqtyǵy. Bıýdjettik protsestiń kezeńderi ıaǵnı, qurylýdan bastap júzege asýǵa deıingi aralyqtyń barlyǵy ashyq bolýy kerek. Azamattar qajet etpeıtin taýarlar alynyp, ǵımarattar salynyp jatatyn mysaldar az emes. Tıimsiz «ımıdjdik» jobalar men baǵdarlamalardan bas tartý qajet. Dańǵoılyq pen ysyrapshyldyqqa jol bergen sheneýnikter qatań jazalanýy kerek. Halyqtyń qarjysy tıimsiz jumsalsa, quqyq buzýshylyqqa jol berilse, onyń jazasy aýyr bolady. Memlekettik organdar janyndaǵy uıymdar men ulttyq kompanııalar da qoǵam baqylaýynda ashyq ári túsinikti bolýy kerek.
Besinshi kezekte jemqorlyqqa qarsy saıasatta óńirlerdiń rólin kúsheıtý qajet. Ákimderge aıtarym, jemqorlyqty túbegeıli joıý sizderdiń jumystaryńyzdyń negizgi kórsetkishiniń biri bolady. Oǵan sizder tikeleı jaýaptysyzdar. Árbir eldi mekenniń óz bıýdjetine baılanysty tórtinshi deńgeıli bıýdjetti qurýdy aıaqtaý týraly mindet qoıamyn. Meniń Prezıdent retindegi ustanymym bıýdjet shyǵyndaryn josparlaýǵa, ásirese óńirlerde halyqtyń ókilderin qatystyrý kerek. Budan el ekonomıkasy damyp, tıisinshe, halyqtyń ál-aýqaty artady.
Altynshy - memlekettik qyzmet kórsetý isindegi údemeli tsıfrlandyrý. Memlekettik apparat qyzmet kórsetý barysynda tutynýshylarǵa beıimdelý qajet. Turmystyq jemqorlyqty joıýdyń birden bir kózi - memlekettik qyzmet kórsetýdi elektrondy nusqaǵa kóshirý. Bul jerde sheshimin tappaǵan máseleler bar. Búginde málimetter bazasynyń 33 paıyzy ǵana ıntegratsııalanǵan. Tsıfrlyq damý, qorǵanys jáne aeroǵarysh ónerkásibi mınıstrligi osy jumysty sapaly ári ýaqytyly aıaqtaýy qajet. Elektrondy Úkimetti damytý aıasynda azamattardyń kórsetiletin memlekettik qyzmetterdi mobıldi nusqada alýy úshin jappaı oqytý jumystaryn damytý kerek.
Jetinshi mindet - memlekettik satyp alý júıelerin jetildirip, bızneske ákimshilik qysymdy tómendetý. Búginde 25 myń uıym memlekettik satyp alýlardy júzege asyrady. Bul jemqorlyqqa qarsy baqylaýdy qıyndatady. Osyǵan baılanysty, memlekettik satyp alýlardy ortalyqtandyryp, áleýmettik saladaǵy bıýdjettik mekeme basshylaryn bul mindetterden bosatý kerek. Kolledjder men mektep dırektoryna deıin memlekettik satyp alýǵa qatysy bar. Ortalyq memlekettik organdarda saıası qyzmetshilerdi memlekettik satyp alýlarǵa aralastyrmaıtyn mehanızmder ázirleýdi tapsyramyn. Sonymen qatar memlekettik fýnktsııalardy básekelik ortaǵa berý kerek. Bul týraly jıi aıtylsa da, 5 fýnktsııa ǵana jeke sektorǵa berilgen. Premer-Mınıstrdiń birinshi orynbasary Á.Smaıylovqa jáne Ulttyq ekonomıka mınıstrine tıisti jumystardy júrgizýdi tapsyramyn.
Úkimet pen Prezıdent Ákimshiligine osy jıynda kóterilgen máselelerdi sheshý úshin engizilgen usynystar negizinde jumys isteý tapsyryldy.