QR Prezıdenti kandıdatyna qoıylatyn talaptar obektıvti - sarapshy

NUR-SULTAN. QazAqparat - Qazaqstan Respýblıkasy Prezıdenti úmitkerine qoıylatyn barlyq talaptar obektıvti ári halyqaralyq standarttarǵa saı keledi. Mundaı pikirdi QR Zańnama jáne quqyqtyq aqparat ınstıtýtynyń dırektory Ramazan Sarpekov bildirdi, dep habarlaıdy QazAqparat tilshisi.

«Qazaqstan Respýblıkasy Prezıdentine úmitkerge qoıylatyn barlyq talaptar obektıvti, halyqaralyq standarttarǵa , ulttyq zańnama talaptaryna saı keledi. Máselen Qazaqstan Respýblıkasy Konstıtýtsııasynyń 41-baby men 1995 jyldyń 28 qyrkúıeginde qabyldanǵan «Qazaqstan Respýblıkasyndaǵy saılaý týraly» Konstıtýtsııalyq zańnyń 54-babyna sáıkes Qzaqstan Respýblıkasynyń Prezıdentine bolyp týmysynan Respýblıka azamaty bolyp tabylatyn, qyryq jasqa tolǵan, memlekettik tildi erkin meńgergen, Qazaqstanda sońǵy on bes jyl boıy turatyn jáne joǵary bilimi bar azamat kandıdat bola alady», - dedi Ramazan Sarpekov.

Sonymen qatar, ınstıtýt dırektory QR Prezıdenti kandıdatyna ózge de talaptardyń qoıylýy múmkin ekendigin atap ótti. Atap aıtqanda, prezıdent laýazymyn atqarýǵa kedergi keltiretin aýrýynyń joq ekendigin naqtylaý úshin medıtsınalyq kýálandyrý júrgiziledi. Nátıjesinde kandıdattyń densaýlyǵy týraly medıtsınalyq qorytyndy rásimdeledi. Munan bólek, prezıdent kandıdatynyń memlekettik qyzmette ne bolmasa saılanbaly memlekettik laýazymda keminde 5 jyldyq eńbek ótili bolýy tıis.

«Buǵan qosa, kandıdattyń sońǵy 15 jyl Qazaqstanda turǵany men memlekettik tildi erkin meńgergendigin Ortalyq saılaý komıssııasy bekitken erejege saı aıqyndalady. Sottalǵandyǵy belgilengen tártippen ótelmegen nemese alyp tastalmaǵan, sybaılas jemqorlyq qylmys jáne sybaılas jemqorlyq quqyq buzýshylyq jasaýdaǵy kinásin sot zańda belgilengen tártippen tanyǵan adam Qazaqstan Respýblıkasy prezıdenttigine kandıdat bola almaıtyndyǵyn da bilgen jón», - dedi ınstıtýt basshysy.