QR Prezıdenti Ermekbaevqa dinı ekstremızm máselelerin retteýdi tapsyrdy

ASTANA. QazAqparat - Elbasy Nursultan Nazarbaev Din isteri jáne azamattyq qoǵam mınıstri Nurlan Ermekbaevty qabyldady, dep habarlaıdy Aqordanyń baspasóz qyzmeti.

Kezdesý barysynda Memleket basshysyna Din isteri jáne azamattyq qoǵam mınıstrliginiń qyzmeti men aldaǵy jumys jospary týraly esep berildi.

Qazaqstan Prezıdenti din salasynda qalyptasyp otyrǵan jaǵdaıǵa toqtalyp, mınıstrliktiń rólin, oǵan júktelgen mindetterdi erekshe atap ótti.

- Buǵan deıin bizde mundaı mınıstrlik bolǵan joq. Dinı qoǵamdastyqtarmen, úkimettik emes sektormen jáne jastar uıymdarymen jumysty jolǵa qoıyp,  ony ári qaraı jalǵastyrý qajet, - dedi Nursultan Nazarbaev.

Elbasy memlekettiń dinge jáne dinı uıymdarǵa, dinı ekstremızmmen kúres sharalaryna qatysty júrgizip otyrǵan saıasatyna aıryqsha nazar aýdardy.

- Elimizde kez kelgen dinı birlestiktiń jumys júrgizýine barlyq jaǵdaı jasalǵan, din ustaný bostandyǵyna kepildik berilgen. Bul salada bizge baıyptylyq kerek. Sonymen birge dinı ekstremızm máselelerin rettep, zańnamany qaıta qarastyrý qajet. Mınıstrlik aldynda aýqymdy jumystar tur, - dedi Memleket basshysy.

N.Ermekbaev Qazaqstan Prezıdentine ózi basshylyq etetin saladaǵy jaǵdaıdyń turaqty ekenin týraly habarlap, búginde elimizde qyzmetin júrgizip otyrǵan  18 konfessııanyń 3600-den astam dinı birlestigi bar ekenin aıtty. Mınıstrdiń aqparaty boıynsha, birlestikterdiń kóbi ıslam dinine tıesili.

Sondaı-aq, N.Ermekbaev Nursultan Nazarbaevqa mınıstrliktiń etnosaralyq jáne konfessııaaralyq tatýlyq pen kelisimdi saqtaı otyryp, memleket pen dinı birlestikterdiń qazaqstandyq ózara is-qımyl modelin qalyptastyrý baǵytyndaǵy jumysy týraly baıandady.

Kezdesý qorytyndysy boıynsha Elbasy birqatar naqty tapsyrma berdi.