QR Prezıdenti EAEO elderine transshekaralyq kólik áleýetin damytýdy usyndy

NUR-SULTAN. QazAqparat – Eýrazııalyq ekonomıkalyq odaq elderiniń transshekaralyq kólik arterııalary men logıstıkalyq habtarynyń áleýetin damytý kerek. Bul týraly QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Transshekaralyq kólik arterııalary men logıstıkalyq habtardyń áleýetin damytý da mańyzdy. Eýrazııalyq ekonomıkalyq odaqty «Beldeý men jol» bastamasymen túıindestirý jáne zamanaýı logıstıkalyq ınfraqurylymdardy qalyptastyrý odaqtyń álemdik taýar aǵynyndaǵy ekonomıkalyq yqpalyn aıtarlyqtaı kúsheıte túsedi», - dedi Qasym-Jomart Toqaev Joǵary Eýrazııalyq ekonomıkalyq keńes otyrysynda.

Memleket basshysynyń atap ótýinshe, EAEO elderi qazirdiń ózinde ınfraqurylymdyq jáne kóliktik jobalar toptamasyn ázirlep otyr.

«Olardy júzege asyrýdy jeteldetýmen qatar shekaralyq kólik aǵyndaryna qyzmet kórsetý baǵasyna tartymdy tarıf qurý da mańyzdy. Buǵan deıin de aıtqanymdaı, kólik vedomstvolaryn barynsha tyǵyz yntymaqtastyqqa shaqyramyn. Buǵan qosa, komıssııa barlyq memlekettermen birge kólik dálizderine, kedergilerge keshendi sholý jasap, olardy joıý boıynsha naqty is-sharalar usyna alar edi dep sanaımyn»,- dedi QR Prezıdenti.