QR Prezıdenti «Dıplommen aýylǵa» baǵdarlamasyn toqtatpaýdy tapsyrdy

ASTANA. QazAqparat - «Dıplommen aýylǵa» baǵdarlamasyn toqtatpaý kerek. Bul týraly búgin «Nur Otan» partııasy Saıası keńesiniń keńeıtilgen otyrysynda Elbasy Nursultan Nazarbaev aıtty, dep habarlaıdy QazAqparat tilshisi.

«Dıplommen aýylǵa» baǵdarlamasyn toqtpaýymyz kerek. Aýyldan báribir qalaǵa kóshý bar, ony toqtata almaısyń. Ýrbanızatsııa búkil álemde júrip jatyr, bizde de bolady. Eger oǵan mamandyq berip týǵan aýylyna bekitip, jumysynyń bastapqy kezeńinde nazar aýdaratyn bolsaq, onda boı úıretip, jumys isteıtin bolady", - dep atap ótti Memleket basshysy.

Osy rette Elbasy jastardyń aýylda eńbek etýine jaǵdaı jasaýda «Nur Otan» jan-jaqty jumystar júrgizýi qajettigin basa aıtty.

«Nurlanǵan Otan jasaımyz dep atyn qoıdyq qoı. Otan degenimiz - eliń, jeriń, otbasyń, bala-shaǵań. «Nur Otan» otanshyldardyń partııasy, Otanyn súıgenderdiń partııasy. «Otanyn súıgender - árbir óz azamatyn súıgender» dep sanaý qajet. Biz osyndaı bolýymyz kerek. Birinshi dárejedegi uıymdarymyz, aýdandarda, qalalarda, oblystarda bar. Olarǵa durys adamdardy qoıyp, jumys istete bilýimiz kerek. Ortalyqtan júrgizip jatqan máseleler, bizdiń qabyldap otyrǵan baǵdarlamalarymyzdyń barlyǵy  qarapaıym adamdar úshin", - dedi Nursultan Nazarbaev.