QR Prezıdenti bıýdjetti túbegeıli qaıta qurýdy tapsyrdy
«Sapasyz jáne biliksiz josparlaýǵa qatysty mysal kóp. Qarjyny tıimsiz qoldanǵany úshin memlekettik organdar qatardaǵy oryndaýshylarǵa eskertý berip qutylady. Tártiptik óndirip alý sany anyqtalǵan quqyqbuzýshylyqtyń kólemine sáıkes kelmeıdi. 2018 jyly 155 qyzmetker jaýapqa tartyldy, onyń 7% ǵana – 11 adam basshylyq qyzmette bolǵan. Úkimetke Esep komıtetimen birlesip, memlekettik jáne kvazımemlekettik sektorda bıýdjet qarajatyn tıimsiz qoldanǵandarǵa, tıimsiz josparlaǵandarǵa jaýapkershilik sharalaryn kúsheıtýdi tapsyramyn. Kvazımemlekettik sektor «saýyn sıyr» bolmaýy kerek. Bul másele zańnamalyq turǵyda sheshilýi tıis. Bul bastamany Parlament qoldaıdy dep úmittenemin», - dedi Qasym-Jomart Toqaev Úkimettiń keńeıtilgen otyrysynda.
Sonymen birge, Memleket basshysy Úkimetke keıinge qaldyrylǵan memlekettik qarjynyń áleýmettik jáne ekonomıkalyq qaıtarymyn baqylaýdy kúsheıtý jóninde usynystar engizýdi tapsyrdy.
Óz kezeginde Qarjy mınıstri Álıhan Smaıylov bul baǵyttaǵy jumystar jóninde baıandady.
«Memlekettik shyǵystardyń ulǵaıýy máselesi bizdiń jumysymyzdaǵy basymdyqtardyń biri bolyp otyr. Byltyrǵy bıýdjettiń oryndalýy men Úkimettiń Parlamenttegi esebin qorytyndylaı kele biz Jol kartasyn qabyldadyq, onda Esep komıtetiniń, Parlament músheleriniń barlyq eskertýlerin nazarǵa aldyq. Jol kartasy aıasynda mańyzdy sharalar keshenin ázirleýdemiz. Eń aldymen bıýdjet shyǵyndaryn josparlaý boıynsha bıýdjet zańnamasyna ózgerister engizý, memlekettik baǵdarlamalar aıasyndaǵy barlyq memlekettik qoldaý sharalaryn qaıta qaraý, baǵa parametrleri shyndyqqa janasý úshin bıýdjettik josparlaýdy satyp alý boıynsha aqparattyq júıelerge jalǵap, avtomattandyrý», - dedi Álıhan Smaıylov.
Óz kezeginde Memleket basshysy bıýdjetti túbegeıli qaıta qurýdy tapsyrdy.
«Meniń tapsyrmalaryma jaqsylap mán berdińizder me? Bıýdjetti túbegeıli qaıta qurý kerek. Qazir bıýdjetti muqııat qarar bolsaq, qoıylǵan tapsyrmaǵa sáıkes kelmeıtin baǵdarlamalyq maqalalar bar», - dep atap ótti Qasym-Jomart Toqaev.
