QR Prezıdenti «Býrabaı» kýrortynda qyzmet sapasyn arttyrýdy tapsyrdy
ASTANA. QazAqparat - Memleket basshysy Nursultan Nazarbaev Aqmola oblysynyń ákimi Málik Myrzalındi qabyldady, dep habarlaıdy Aqordanyń baspasóz qyzmeti.
Qazaqstan Prezıdenti kezdesýde oblystyń týrıstik áleýetin, sonyń ishinde «Býrabaı» kýrortyn odan ári damytý jumystary týraly surady.
Elbasy kýrorttyq aımaqqa kelýshiler sany jyldyń ár mezgilinde ártúrli ekenine nazar aýdaryp, týrısterge kórsetiletin qyzmetterdiń sapasyn arttyrý boıynsha sharalar qabyldaýdy tapsyrdy, sondaı-aq kórsetiletin qyzmetterdiń deńgeıine saı kelmeıtin baǵalardyń joǵary ekenin atap ótti.
- «EKSPO-2017» kórmesiniń ótýin tıimdi paıdalaný qajet. Kóptegen týrıster keldi, sonyń ishinde sheteldikter de bar. Biraq, ekologııalyq júıege salmaq salmaý kerek. Sonymen qatar, adamdardyń demalýy úshin jaqsy jaǵdaı jasaǵan jón, - dedi Nursultan Nazarbaev.
Sondaı-aq, Memleket basshysy óńirdiń áleýmettik-ekonomıkalyq kórsetkishterin kóterýdiń mańyzdylyǵyna toqtalyp, oblys basshylyǵy tarapynan erekshe mán berýdi qajet etetin birqatar salany aıtty.
M.Myrzalın Qazaqstan Prezıdentine týrısterdiń qazirgi demalys oryndaryna degen qyzyǵýshylyǵyn arttyrýǵa baǵyttalǵan ınfraqurylymdyq jobalardyń iske asyrylý barysy týraly baıandap, óńir qonaqtary men turǵyndarynyń jaıly ómir súrýin qamtamasyz etý jónindegi mindetterdi sheshýge arnalǵan josparlarmen tanystyrdy.
