QR Prezıdenti: Biz memleket retindegi ósý-órkendeýdiń jańa satysyna kóterildik
ALMATY. Aqpannyń 3-i. QazAqparat /Erlik Erjanuly/ - EQYU-ǵa tóraǵalyqty Qazaqstandy álemge odan ary tanytý úshin paıdalaný kerek. Bul týraly Elbasy búgin Almatydaǵy rezıdentsııasynda bir top ádebıet pen óner qaıratkerlerine Prezıdenttik jáne Memlekettik stıpendııalardy tapsyrý rásiminde aıtty,
dep habarlaıdy QazAqparat.
«Ekonomıka qarqyndy damyǵannan bastap basqalar Qazaqstannyń kim ekenin tanıtyn boldy. Osynyń barlyǵy táýelsizdikti nyǵaıtý úshin eń aldymen ekonomıkany nyǵaıtý kerektigin túsinip, halqymyz qoldaǵanynyń arqasy. Bir kezderi sheteldikterden kartadan Qazaqstan qaı jerde dep surasań kórseta almaıtyn edi ǵoı. Al endi mine, EQYU-ǵa tóraǵa bolyp otyrmyz. Úsh qurlyqqa ornalasqan 56 memlekettiń basyn quraıtyn úlken uıymǵa Qazaqstandy tóraǵa etýge sol elder jınalyp sheshim qabyldady. Jalpy, túrki elderi ishinde, TMD elderi arasynda biz tuńǵysh ret osyndaı dárejege jetip otyrmyz», dedi QR Prezıdenti Nursultan Nazarbaev. Elbasynyń aıtýynsha, Qazaqstan qazir memleket retindegi ósý-órkendeýdiń jańa satysyna kóterilip, irgesi berik, yqpaldy memleketke aınaldy. Endigi másele, barymyzdy baǵalap, zaman bıiginen kóriný bolmaq.
