QR Prezıdenti: Biz qulpynaıdy kórshimizden emes Izraılden tasyp otyrmyz
«Eń basty nazardy saýda-ekonomıkalyq yntymaqtastyqqa aýdardyq. Bizdiń óńir óte qarqyndy damyp keledi jáne biz álemde bar trendterge qaraı otyryp, elderdi ındýstrııalandyrý, tsıfrlandyrý boıynsha jumys isteýimiz jáne tehnologııalyq damýdan qalyp qoımaýymyz kerek. BUU málimetinshe, sońǵy 10 jylda bizdiń elderimizdiń ortasha JІÓ ósimi 6,2 paıyz bolsa, búkil álem 2,6 paıyz qarqynmen damydy. Bul atalǵan memleketter birge ortasha álemdik kórsetkishten eki eseden astam qarqynmen damydy degen sóz. Taýar aınalymynyń da kúrt ósimi baıqalady», - dedi Nursultan Nazarbaev.
Memleket basshysynyń atap ótýinshe, Ortalyq Azııa elderiniń ózara taýar aınalymy 10 jyldyń ishinde 2 ese ósip, 1,6 mlrd dollardan 3,1 mlrd dollarǵa jetip otyr. Bul óńir turǵyndarynyń ál-aýqatyn jaqsartýǵa septigin tıgizýde.
«Biz kelesi sharalardy qarastyrdyq. Birinshiden, elder arasyndaǵy ózara saýda taýarlarynyń nomenklatýrasyn keńeıtý qajet. Statıstıkaǵa qarasaq, máselen, Qazaqstan kórshilerde bar taýarlardy basqa jaqtan tasyp otyr. Al olar, máselen Tájikstan GES salýǵa qajetti metalldy basqa jaqtan alady. bizde, Qaraǵandy metallýrgııa kombınatynda sol armatýra qansha kerek bolsa, sonsha shyǵara alady, al olar Eýropadan tasýda», - dedi Elbasy.
Qazaqstan Prezıdenti jemis-jıdek pen kókónisti kórshi elderden alýǵa bolatynyn atap ótti.
«Al biz bolsaq, qulpynaıdy Izraılden tasyp otyrmyz. Bul qarapaıym másele emes, osy saýdanyń basynda otyrǵan sheneýnikterimizdi ózgertýimiz qajet. Olarǵa ózderine belgili dostarymen qasynda turǵandy alǵannan góri basqa jaqtan ákelgen tıimdi bolyp otyr. Biz bul jaıynda sóılestik», - dedi Nursultan Nazarbaev.
Aıta keteıik, Aqordada ótken keńeske Qazaqstan Prezıdenti Nursultan Nazarbaev, Qyrǵyz Respýblıkasynyń Prezıdenti Sooronbaı Jeenbekov, Tájikstan Respýblıkasynyń Prezıdenti Emomalı Rahmon, Ózbekstan Respýblıkasynyń Prezıdenti Shavkat Mırzıeev jáne Túrikmenstan Medjlıs tóraıymy A.T.Nýrberdyeva hanym qatysty.
