QR Prezıdenti: Bir top jas ǵalymǵa arnap zerthana salýǵa bolady
31 jastaǵy jas fızık Ernur Rysmaǵambetov Prezıdenttiń aldynda ózin tanystyra kele, fızıka salasyndaǵy jetistikterin tizip ótti. Qazirgi ýaqytta Ernur «Astana» halyqaralyq qarjy ortalyǵynda úzdiksiz kásibı damý bıýrosyn basqarady. Fızıkadan birneshe iri baıqaýlardyń jeńimpazy.
«2002 jyly fızıka páninen dúnıejúzilik olımpıadada birinshi oryndy ıelenip, altyn medalǵa qol jetkizdim. Sol jyly álemge áıgili Kalıfornııa ýnıversıtetine shaqyrtý aldym. Alaıda, sol jyly Amerıkaǵa ushyp barýǵa qajetti 1200 AQSh dollaryn tabýdyń ózi qıyn edi. Úmitim úzile jazdady. Túrli kompanııalardan demeýshilik suradym. Sońynda taǵy bir halyqaralyq olımpıadadan top jaryp, quny 1300 AQSh dollarlyq noýtbýkty syıǵa aldym. Biraq ony jolǵa bılet alý úshin satyp jiberdim», - deıdi Ernur.
Jas óren barǵan ýnıversıtinde tanymal ónertapqysh Ilon Maskpen kezdesipti. Qarjy salasyna qatty qyzyǵyp, halyqaralyq qarjy ortalyqtarynyń jumysyn Ernur Amerıkada meńgere bastaǵan.
«Úlken tájirıbe jınap, elge oraldym. Birneshe halyqaralyq ınvestıtsııalyq qorda eńbek etkenimmen, elge qyzmet etý armanyma aqyry bet burǵan edim. 2009 jyly mektep oqýshylaryn fızıka páninen daıyndaı bastadym. Meksıka, Taıland elderinde fızıka pániniń bilgir oqýshylarymyz úzdik ondyqqa kirdik», - deıdi Ernur.
Otty jastyń sózine yrza bolǵan Elbasy aldaǵy ýaqytta da ǵylymı bastamalarǵa qoldaý bildiretinin aıtyp ótti.
«Matematıka men fızıka - bolashaqtyń ǵylymy. Árıne, mamandar daıarlaý kerek. Búkil dúnıejúzindegi ósip-órkendep ketken elderdiń barlyǵy sol mamandyqtardy meńgerip, jańalyqtardyń barlyǵyn ashty. Sondaı bolsa eken dep oılaımyn. Eger de sondaı jas bir top ǵalymdar bolsa, solarǵa arnap arnaıy zerthana salýǵa bolady. Jumys júrgizip, jaǵdaılaryn jasaýǵa bolady. Sebebi, bizge qajeti sol. Sol úshin «Bolashaq» baǵdarlamasy arqyly qyzdar men uldardy jiberip otyrmyn ǵoı», - dep atap ótti Nursultan Nazarbaev.
