QR Prezıdenti Beıjiń-Astana-Máskeý-Berlın baǵytynda temirjol salýdy usyndy
«ShYU-nyń sapaly ekonomıkalyq serpilisine ınfraqurylymdyq megajobalar septigin tıgize alady. Bul qýatty mýltıujymdyq tıimdilikti qamtamasyz etip, ǵylymı jáne qarjylyq áleýetti jumyldyrýǵa, ShYU-ǵa múshe memleketterdiń kóptegen mamandaryn jumysqa ornalastyrýǵa múmkindik beredi», - dedi Elbasy.
Osy rette Memleket basshysy mysal retinde Beıjiń-Astana-Máskeý-Berlın baǵyty boıynsha eýrazııalyq joǵary jyldamdyqty temirjol magıstralin salý ıdeıasyn usyndy.
«Mundaı baǵdardy ShYU-ǵa múshe basqa memleketter arqyly da júrgizýge bolady. Bul bizdiń uıym úshin asa mańyzdy. Bul jobany júzege asyrý ShYU, Eýrazııalyq ekonomıkalyq odaqtyń, keleshekte Eýropalyq odaqtyń ózara is-qımylynyń perspektıvaly formatyn biriktirýdi júzege asyrady dep oılaımyn», - dedi Nursultan Nazarbaev.
Qazaqstan Prezıdenti kelesi aıda «EKSPO-2017» kórmesiniń ornynda «Astana» halyqaralyq qarjy ortalyǵynyń resmı iske qosylýy josparlanyp otyrǵandyǵyn aıtty.
«Bizge álemdik qarjy ortalyqtarynyń úzdik modelderin júzege asyrý qajet. Ortalyq Qazaqstan ekonomıkasyn ǵana ártaraptandyryp qoımaı, ShYU-nyń barlyq elderiniń qarjy ınstıtýttarynyń damýyna oń septigin tıgizedi. ShYU elderiniń qarjy ınstıtýtaryn, bıznes qoǵamdastyqtaryn, iskerlik toptaryn osy jyldyń 5 shildesinde AHQO múmkinshilikterin keńinen paıdalanýǵa shaqyramyn», - dedi Elbasy.
Munan bólek, otyrysta Nursultan Nazarbaev ShYU-nyń strategııalyq basymdyǵyn atap, jańa tehnologııalar boıynsha tájirıbe almasatyn alań qurýdy usyndy.
Aıta keteıik, otyrysqa Qazaqstan Prezıdenti Nursultan Nazarbaev, Reseı Prezıdenti Vladımır Pýtın, Qyrǵyz Prezıdenti Sooronbaı Jeenbekov, Pákistan Prezıdenti Mamnýn Hýseın, Tájikstan Prezıdenti Emomalı Rahmon, Ózbekstan Prezıdenti Shavkat Mırzıeev, Úndistan Premer-Mınıstri Narendra Modı, ShYU-ǵy baıqaýshy mártebesi bar Aýǵanstan Prezıdenti Ashraf Ǵanı, Belarýs Prezıdenti Aleksandr Lýkashenko, Iran Prezıdenti Hasan Roýhanı jáne Mońǵolııa prezıdenti Haltmaagıın Battýla jáne birqatar halyqaralyq uıymnyń basshylary qatysýda.
Keńeıtilgen quramdaǵy otyrystan keıin sammıttiń basty qujaty Tsındao deklaratsııasy qabyldanyp, 20-dan astam qujatqa qol qoıylmaq. Onyń 17-sin Memleket basshylary rásimdeıdi.
