QR Prezıdenti Belarýspen aradaǵy tranzıttik-kóliktik ózara is-qımyl týraly aıtty

NUR-SULTAN. QazAqparat – Búgin Aqordada Belarýs Prezıdenti Aleksandr Lýkashenkomen kelissózderden keıin QR Prezıdenti Qasym-Jomart Toqaev eki el arasyndaǵy yntymaqtastyqty nyǵaıtýdyń múmkindigin aıtty, dep habarlaıdy QazAqparat tilshisi.

«Ekijaqty qatynastardy damytýda eleýli ról tranzıttik-kóliktik ózara is-qımylǵa tıesili. Egerde Qazaqstan Azııaǵa shyǵatyn qaqpa bolsa, Belarýs - Eýropaǵa kópir. Búginde osy salada Birikken kóliktik-logıstıkalyq kompanııa sátti jumys isteýde, oǵan Qazaqstan men Belarýs aktsıoner bolyp sanalady. Onyń qyzmeti nátıjesinde sońǵy úsh jylda konteınerlik temirjol tasymaly Qazaqstan men Belarýs arqyly Qytaı -Eýropa - Qytaı baǵytynda 6,5 esege jýyq artty. Sondyqtan barlyq múmkindikterdi paıdalana otyryp, bizdiń ózara is-qımylymyzdy ary qaraı nyǵaıta túsý kerek. Búginde ІT-salany damytý ózekti taqyrypqa aınalyp otyr», - dedi QR Prezıdenti.

Q. Toqaev Belarýs tarapyna «Astana» halyqaralyq qarjy ortalyǵy úlken qyzyǵýshylyq týdyra alatynyn aıtty.

«Taraptardyń jınaqtalǵan tájirıbesin eskere otyryp, biz birqatar birlesken jobany júzege asyrýdy pysyqtaýǵa ýaǵdalastyq. Osy oraıda bizdiń elderdiń óńirleri arasynda ekonomıkalyq baılanystardy belsendi damytýǵa múddelimiz», - dedi Memleket basshysy.

Prezıdenttiń atap ótýinshe, óńiraralyq yntymaqtastyq forýmyn ótkizý máselesin qarastyrý usynyldy.

«Óńirler deńgeıindegi bizdiń yntymaqtastyq tabysty ári jemisti bolatynyna senimdimin», - dedi Memleket basshysy.