QR Prezıdenti Aýǵanstanmen qarym-qatynas boıynsha pikir bildirdi

MıÝNHEN. QazAqparat – Mıýnhen qaýipsizdik konferentsııasynda Qasym-Jomart Toqaev Aýǵanstanmen qarym-qatynasqa baılanysty pikir bildirdi, dep habarlaıdy QazAqparat tilshisi.

«Geografııalyq ornalasýdyń mańyzy: Ortalyq Azııadaǵy qazirgi jaǵdaı» taqyrybyndaǵy ótken paneldik pikirtalas kezinde Halyqaralyq qatynastar keńesiniń prezıdenti Rıchard Haas Ortalyq Azııanyń Aýǵanstanǵa qatysty ustanymy týraly surady.

Qazaqstan Prezıdenti Ortalyq Azııa jáne Aýǵanstan qarym-qatynas formaty aımaqtaǵy turaqtylyqqa úlken úles qosatynyn atap ótti.

Osy oraıda, Qasym-Jomart Toqaev Qazaqstannyń oqý oryndarynda bilim alý úshin aýǵan stýdentterine jaǵdaı jasalǵanyn eske saldy.

Munymen qosa, Memleket basshysy Qazaqstan úshin Aýǵanstan jaqsy seriktes ekenin atap ótti.

Buǵan deıin habarlanǵandaı, 15 aqpan kúni Mıýnhen qalasynda Qazaqstan Prezıdenti Qasym-Jomart Toqaev Aýǵanstan Islam Respýblıkasynyń Prezıdenti Ashraf Ǵanımen kezdesti.

Áńgimelesý barysynda memleketter basshylary saýda-ekonomıkalyq, kólik-logıstıkalyq, gýmanıtarlyq salalardaǵy ekijaqty yntymaqtastyqtyń qazirgi ahýaly men ony nyǵaıtýdyń perspektıvalaryn talqylady. Sonymen qatar, óńirlik jáne halyqaralyq kún tártibindegi ózekti máseleler jóninde pikir almasty.

Eske sala keteıik, 14 aqpanda Memleket basshysy Qasym-Jomart Toqaev Germanııanyń Mıýnhen qalasyna eki kúndik jumys saparymen keldi.

Mıýnhen qaýipsizdik konferentsııasynda Prezıdent kórshiles eldermen ózara tıimdi qarym-qatynas týraly aıtty.

Aıta keteıik, QR Prezıdentiniń keńesshisi Erlan Qarın Mıýnhen konferentsııasynda Ortalyq Azııadaǵy protsesterge erekshe nazar aýdarylǵanyn jetkizdi.

Foto: Aqorda