QR Prezıdenti «Astana» qarjy ortalyǵynyń paıdasyn qarapaıym tilde túsindirdi

ASTANA. QazAqparat - Otandyq BAQ ókilderine suxbat bergen QR Prezıdenti Nursultan Nazarbaev «Astana» Halyqaralyq qarjy ortalyǵynyń xalyqqa beretin paıdasyn qarapaıym tilde túsindirip berdi. Atalǵan ortalyq kelesi jyldan bastap EKSPO aımaǵynda jumys isteı bastaıdy, dep xabarlaıdy QazAqparat tilshisi.

"Ondaı qarjy ortalyǵy Ortalyq Azııada alǵash ret ashylyp otyr. Ondaı ortalyq Reseıde de joq. Qazir álemge tanymal bankter ortalyqpen birlesip jumys isteýge kelisti. Olardyń ishinde Dúnıejúzilik bank, Eýropalyq bank, Azııalyq bank, Islam banki jáne taǵy basqalar bar. Barlyǵy óz keńselerin ashyp, aqsha ákeledi. Qurylysqa aqsha salady. Kórshi elderge de qarjy  quıatyn shyǵar. Halyq bolsa, aqshany aktsııalarǵa salyp, dıvıdend alýdy úırenedi", - dedi Memleket basshysy.

Prezıdenttiń aıtýynsha, "Astana" Halyqaralyq qarjy ortalyǵy London, Shanxaı, Gonkong pen Dýbaı bırjalary úlgisinde qurylyp otyr. Ol jerde barlyq ınvestıtsııalyq daýlar aǵylshyn soty negizinde qorǵalady. "Men sýdıany da bekitip qoıdym. Ol Londonda bas sýdıa qyzmetin atqarǵan. Qalǵan 9 sýdıa da sondaı. Sebebi aqsha ákeletin adamdar da, kompanııalar da óz kapıtalynyń qaýipsizdigine senimdi bolýy qajet. Sotqa senim bolýy shart. Álemdik arbıtrajǵa barmaı, bárin osy jerde sheshý kerek", - dep atap kórsetti N.Nazarbaev.

Aıta keteıik, óz suxbatynda Memleket basshysy bıýdjet aqshasy bankterge ne úshin berilip jatqanyn da túsindirdi. Óz sózinde Memleket basshysy BTA bankin eske aldy.  Budan bólek, "EKSPO-ǵa jumsalǵan aqsha aqtala ma?" degen suraqqa jaýap berdi.  Nursultan Nazarbaev qaltaly azamattardy oralmandarǵa kómek berýge úndedi.