QR Prezıdenti: «Astana» HQO qarjy haby rólin atqarýǵa tıis
Kezdesýde Q.Kelimbetov Elbasyǵa respýblıkada Qazaqstan Prezıdentiniń bastamasymen ozyq álemdik tájirıbe negizinde qurylǵan, qarjylyq qyzmetter kórsetetin jetekshi ortalyq qalyptastyrý jónindegi sharalar jıyntyǵynyń iske asyrylýy týraly baıandady.
Nursultan Nazarbaev «Astana» halyqaralyq qarjy ortalyǵy (AHQO) strategııasyn júzege asyrý el ekonomıkasyna eleýli qarjy resýrsyn tartýǵa múmkindik beretinin atap ótti.
- «Astana» halyqaralyq qarjy ortalyǵy Qazaqstannyń qarjy ınfraqurylymynyń ózegine aınalyp, Ortalyq Azııa men Eýrazııalyq ekonomıkalyq odaqtyń qarjy haby rólin atqarýǵa tıis, - dedi Elbasy.
Q.Kelimbetov byltyrǵy jeltoqsan aıynda «Astana» halyqaralyq qarjy ortalyǵy týraly konstıtýtsııalyq zańǵa qol qoıylýy postkeńestik keńistikte tuńǵysh ret aǵylshyn quqyǵy qaǵıdaty negizinde jumys júrgize bastaýǵa múmkindik bergenin aıtty.
Qarjy ortalyǵynyń basqarýshysy Qazaqstan Prezıdentin AHQO-ny qurý týraly ıdeıanyń halyqaralyq ınvestıtsııalyq orta ókilderi tarapynan óte joǵary baǵaǵa ıe bolyp otyrǵany týraly habardar etti.
- Memleket basshysynyń shetelge saparlary barysynda qol jetkizilgen ýaǵdalastyqtar ortalyqtyń jumysyna erekshe serpin berip otyr. Atap aıtqanda, «10 trıllıon» klýbynyń ókilderimen ótken kezdesýdiń tabysty bolǵany atap ótildi, - dedi Q.Kelimbetov.
Memleket basshysy qarjy qyzmetteri naryǵynyń álemdik kóshbasshylarymen yntymaqtastyq ornatýdyń jáne AHQO qyzmetkerleriniń joǵary kásibı quramyn jasaqtaý baǵytynda júrgiziletin jumystyń mańyzdylyǵyna basa nazar aýdardy.
Kezdesý qorytyndysy boıynsha Elbasy birqatar naqty tapsyrmalar berdi.
