QR Prezıdenti arxıviniń birqatar qujattary aqtaýlyqtarǵa syıǵa tartyldy
AQTAÝ. QazAqparat - Aqtaýda qazaq eliniń astanasy men Kaspıı jaǵalaýyndaǵy aqmarjan shaharǵa qatysty Elbasynyń jeke muraǵatynan ákelingen 50-ge tarta qujattar men sýretter syıǵa berildi, dep xabarlaıdy QazAqparat tilshisi.
«Astana - uly dala júregi, Aqtaý - teńiz joly, tiregi». Osyndaı ataýmen óńirde muraǵattyq kórme ótti. Elorda men aqmarjan qala Aqtaýdyń tarıhynan syr shertetin sýretter mereıtoıǵa oraı jınaqtalypty. Jalpy, 160-qa jýyq qujattar men fotolar bar.
Ásirese, Elbasynyń jeke arxıvinen alynǵan baıandamalary, qaýlylary jáne syzba eskızderin tamashalaǵan jurttyń qarasy qalyń.
Sondaı-aq, Mańǵystaýda ótken mańyzdy sharalardan estelikter bar.
«Aqtaý-táýelsizdigimizdiń jemisine óz úlesin qosyp otyr. Mynaý 12 tamyzda 5 eldiń basshylary bas qosyp, úlken sammıt ótti. Ondaǵy beınesýretterdi kórmege qoıyp otyrmyz. 55 jylda jetken jetistikterdi qujattar arqyly kórsetýge tyrystyq. Merekelerińiz qutty bolsyn!»,- deıdi QR Prezıdenti arxıvi QPU basqarmasynyń basshysy Bólegen Qasenov.
Onyń aıtýynsha, Astananyń záýlim jáne tanymal ǵımarattarynyń qalaı salynǵany, Elbasynyń qurylys alańynda bolýy, Prezıdenttiń óz qolymen ózgertken alǵysózderi jınaqtalǵan sýretter de bar. Fotokórmedegi jınaqtar Mańǵystaý oblystyq arxıvine syıǵa tartyldy.
