QR Prezıdenti: Arnaıy jasaqtalǵan qarýly bandalar bılikti basyp alǵysy keldi

NUR-SULTAN. QazAqparat – QR Prezıdenti Qasym-Jomart Toqaev qańtarda bolǵan jappaı tártipsizdikterge qatysty reseılik sarapshylardyń pikirine qatysty óz oıyn aıtty, dep habarlaıdy QazAqparat tilshisi.

Suhbat barysynda Reseıdegi birqatar sarapshylar elimizde bolǵan oqıǵaǵa qatysty «Tóńkerisshilerdiń maqsaty Prezıdent Qasym-Jomart Toqaevty Qazaqstannan qýyp shyǵý nemese tutqynǵa alý» degen boljam jasady. Sol ras pa? Biraq Siz olardyń josparyn joqqa shyǵardyńyz. Osyǵan baılanysty Ózińiz qandaı naqty túsinikteme berer edińiz? degen saýal qoıyldy.

«Bálkim, bul Reseıdiń barlaý qyzmetiniń kózqarasy shyǵar. Bul ras ta bolýy múmkin. Olar bizdiń elimizdegi oqıǵalardy muqııat baqylap otyrady ǵoı. Qalaı desek te, arnaıy jasaqtalǵan qarýly bandalar bılikti basyp alǵysy keldi. Sondyqtan, sheteldik sarapshylar aıtqan pikirdiń jany bar dep oılaımyn. Degenmen, barlyǵyna baıyppen qarap, salmaqty baǵa berý qajet. «Sabyr túbi – sary altyn» dep halqymyz beker aıtpaǵan. Bizge keregi – asyǵys sheshim shyǵaryp, isti jaýyp tastaý emes, mindetti túrde aqıqatqa kóz jetkizý. Bul – meniń aldyma qoıǵan maqsatym», - dedi Qasym-Jomart Toqaev Qazaqstan ulttyq telearnasyna bergen suhbatynda.