QR Prezıdenti: Armııa – eldigimizdiń berik qalqany, Táýelsizdigimizdiń myzǵymas tuǵyry
Jıynda Prezıdent qazaqstandyqtardy Otan qorǵaýshy kúnimen jáne Jeńis meıramymen quttyqtady.
«Halqymyzdyń erlik dástúrin tanytatyn qos merekeni bıyl Táýelsizdigimizdiń 30 jyldyǵy aıasynda atap ótemiz. Egemendiktiń qadir-qasıeti – jerdiń tutastyǵy men eldiń tynyshtyǵynda. Osy asyl qundylyqtardy Qarýly Kúshterimiz qas qaqpaı kúzetip tur. Táýelsizdik jyldarynda Tuńǵysh Prezıdentimiz, Elbasy Nursultan Ábishuly Nazarbaevtyń arqasynda memleketimizdiń myqty qorǵanys júıesin qalyptastyrdyq. Áskerimizdiń bes qarýyn saıladyq. Sarbazdarymyzdyń jaýyngerlik rýhyn kóterip, kásibı mashyǵyn shyńdadyq. Búginde armııamyz – eldigimizdiń berik qalqany, Táýelsizdigimizdiń myzǵymas tuǵyry»,-dedi Qasym-Jomart Toqaev.
Memleket basshysy sonymen qatar Qazaqstannyń beıbitshilik pen turaqtylyqty qalaıtyn memleket ekenin atap ótti.
«Biraq, ulttyq múddege nuqsan keltiretin kez-kelgen áreketke toıtarys bere alamyz. Sońǵy ýaqytta jer júzinde túrli qaqtyǵystar kóbeıip ketti. Sarapshylar alpaýyt memleketter arasyndaǵy tartystardy qyrǵı-qabaq soǵys kezeńindegi ahýalmen teńestirýde. TMD aýmaǵynda, tipti, irgeles kórshi elderde janjaldar paıda bolyp jatyr. Eski daýlarǵa qazirgi túıtkilder qosylyp, jaǵdaı kúrdelene tústi. Bul – bárimizdi alańdatyp otyrǵan másele. Sondyqtan arqany keńge salmaı, ulttyq qorǵanys isinde temirdeı tártip saqtaýymyz kerek»,-dedi QR Prezıdenti.
