QR Prezıdenti Almatydaǵy QR Tuńǵysh Prezıdenti - Elbasynyń qoryna bardy
Memleket basshysyna qordyń bıylǵy 8 aıda atqarǵan jumysy men iske asyrǵan jobalary, sondaı-aq ony odan ári damytý jospary jóninde esep berildi.
«Biz bıyldan bastap qordyń jumysyn birshama ózgerttik. «Tsıfrlyq Qazaqstan» baǵdarlamasyna sáıkes, «Smart Zholy» jáne «Method PRO» jobalary ázirlenip, engizildi. Búkil Qazaqstan boıynsha kompıýter baǵdarlamalaryn jasaýmen aınalysa bastaǵan daryndy jastar men olardyń ónimderin tutynatyn elimizdiń jáne sheteldiń iri kompanııalarymen ózara baılanysyn ornatý - osy jobalardyń basty erekshiligi. Qor ІT-tehnologııalar salasyndaǵy kásibı mamandarǵa aldaǵy ýaqytta da qoldaý kórsetýdi josparlap otyr, - dedi Qordyń atqarýshy dırektory Q.Jumabaev.
Budan soń Nursultan Nazarbaevqa Qazaqstan Respýblıkasynyń Tuńǵysh Prezıdenti - Elbasynyń qory janyndaǵy Álemdik ekonomıka jáne saıasat ınstıtýtynyń jobalary men perspektıvalary jóninde málimdeldi.
Atap aıtqanda, onyń dırektory E.Saltybaev ınstıtýt qyzmetiniń basty baǵytynyń biri retinde búkil Eýrazııa óńirindegi biregeı saraptamalyq-taldaý orny - Astana klýbyn damytý jospary týraly baıandady.
Qazaqstan Prezıdenti Álemdik ekonomıka jáne saıasat ınstıtýtyn júıeli túrde nyǵaıtý qajet ekenin atap ótti.
«Instıtýt búgingi jaǵdaımen ǵana shektelip qalmaýǵa tıis. Halyqaralyq deńgeıge shyǵyp, álemniń jetekshi ǵalymdarymen kezdesýlerdi jan-jaqty jarııalap kórsetý arqyly jurtshylyqqa tanytý kerek», - dedi Nursultan Nazarbaev.
Memleket basshysy Qazaqstan Respýblıkasynyń Tuńǵysh Prezıdenti - Elbasynyń qory jumysynyń tujyrymdamalyq negizine erekshe toqtaldy.
«Biz qordyń basty maqsatyn aıqyn ustanýymyz kerek. Ol - Qazaqstandy halyqaralyq deńgeıde ilgeriletý, elimizdiń ımıdjin jaqsartý, daryndy jastarymyzǵa qoldaý kórsetý jáne sarapshylar qoǵamdastyǵymen ózara tıimdi is-qımyl ornatý. Sondaı-aq, ıadrolyq qarýdyń taralýyna qarsy kúres júrgizý osy qor jumysynyń mańyzdy baǵyty bolýǵa tıis», - dedi Qazaqstan Prezıdenti.
