QR Prezıdenti: Áleýmettik jelilerde jumys isteımin
NUR-SULTAN. QazAqparat - Qazaqstan Prezıdenti Qasym-Jomart Toqaev «Rossııa 24» telearnasyndaǵy «Vestı nedelı» baǵdarlamasyna bergen suhbatynda áleýmettik jelilermen qalaı jumys isteıtindigin aıtty, dep habarlaıdy QazAqparat.
«Maǵan áleýmettik jeliler jat emes, ıaǵnı áleýmettik jelilerde jumys isteımin. Keıbir tapsyrmalardy WhatsApp arqyly beremin. Qaýipsizdik turǵysynan durys bolmaýy múmkin, alaıda tapsyrmalar jedel túrde júkteledi», - dedi Qasym-Jomart Toqaev.
Budan bólek, telearna tilshisi Memleket basshysynyń Twitter-degi paraqshasy týraly surady.
Bul oraıda Prezıdent Twitter-di BUU-daǵy qyzmetinen beri paıdalanyp kele jatqanyn jetkizdi.
«Ol jerde Twitter-de ózińniń jeke paraqshańdy júrgizý durys sanalatyn. Baılanystyń osy túrine ábden úırenip qaldym. Twitter degen ne? Bul jeke telegraf agenttigiń ispetti», - dedi Prezıdent.
Bul turǵyda Memleket basshysy atalǵan paraqshasy arqyly óziniń pikiri men tapsyrmalaryn jıi jarııalap turatynyn, sondaı-aq kóterilgen naqty máseleler boıynsha el halqy jedel habardar bolatynyn aıtty.
«Sonymen qatar, mende Instagram-da paraqsham bar. Biraq ta ony Prezıdent bolǵannan keıin ashtym, ıaǵnı bul paraqshany ashýǵa keńes berdi», - dedi Qasym-Jomart Toqaev.
