QR Prezıdenti Ákimshiliginiń atyn jamylyp qarajat jınaǵan alaıaq quryqtaldy - ІІM
ASTANA. 18 qańtar. QazAqparat /Rýslan Ǵabbasov/ - QR Prezıdenti Ákimshiliginiń atyn jamylyp qarajat jınaǵan alaıaq quryqtaldy.
Bul týraly búgin Іshki ister mınıstrliginiń baspasóz qyzmetinen habarlady.
Krımınaldyq polıtsııa komıtetiniń qyzmetkerleri Taraz qalasynyń 57 jastaǵy turǵyny, Qoǵamdyq qordyń jetekshisin qolǵa túsirdi. Ol Qazaqstan Respýblıkasy Prezıdenti Ákimshiliginiń tapsyrmasyn oryndaý qajet degen syltaýmen aqshalaı qarajat jınaǵan.
«2011 jylǵy qarasha aıynyń sońynda onyń alaıaqtyq jolmen Prezıdent Ákimshiligi basshylyǵy atynan Óskemen qalasyndaǵy JShS-lardyń biriniń shotynan 10 mln. teńge kóleminde aqshalaı qarajat alǵany anyqtaldy. Sonymen qatar, alaıaqtyń birneshe ret basqa da kommertsııalyq qurylymdarǵa ótinish jasaǵan faktisi de anyqtaldy», - delingen taratylǵan málimette.
Atap aıtqanda, 2011 jyldyń jeltoqsan aıynda ol bir korporatsııanyń qarjy dırektoryna ózin ishki ister organdarynyń ardagerleri qamqorlyq qorynyń jetekshisi, polıtsııa polkovnıgi retinde tanystyryp, odan Qazaqstan Respýblıkasy Táýelsizdiginiń 20 jyldyǵyn merekeleýge baılanysty polıtsııa ardagerlerine kómek kórsetýdi ótingen. Ol aqshalaı qarajatty faks arqyly jiberilgen hatta kórsetilgen rekvızıtterge aýdarý qajettigin aıtqan. Alaıda, ondaı múmkindiktiń bolmaýyna baılanysty oǵan aqsha berýden bas tartylǵan.
Munymen qosa, ol Almaty qalasyndaǵy iri fırmalardyń birine osyǵan uqsas ótinish bildirip, olardan 10-15 mln. teńge aýdarýdy surap, olarǵa óziniń Prezıdent Ákimshiligi basshysynyń tapsyrmasyn oryndap otyrǵanyn basa aıtqan. Biraq onyń bul ótinishi de qoldaý tappady. Qazirgi ýaqytta alaıaq tutqynǵa alyndy. Tergeý amaldary júrgizilýde. Onyń osyndaı uqsas basqa da qylmystarǵa qatystylyǵy tekserilýde. Kúdikti buryn alaıaqtyq is-áreketi úshin eki ret sottalǵan.
