QR Prezıdenti Air Liquide kompanııasynyń prezıdenti Fransýa Jakovty qabyldady
Prezıdentke Air Liquide kompanııasynyń Qazaqstandaǵy jobalarynyń júzege asyrylý barysy jáne aldaǵy jospary jóninde málimet berildi.
Fransýa Jakov Qasym-Jomart Toqaevqa tehnıkalyq gaz óndirý salasyna mamandanǵan Air Liquide kompanııasy buǵan deıin Qazaqstanda jalpy ınvestıtsııa kólemi 120 mıllıon eýro bolatyn birneshe jobany júzege asyrǵanyn aıtty.
Atap aıtqanda, «Er Lıkıd Munaı Teh Gazy» birlesken kásiporny Atyraý men Pavlodardaǵy munaı óńdeý zaýyttarynyń bazasynda tehnıkalyq gaz óndirisin jolǵa qoıyp, Atyraý oblysyndaǵy polıpropılen óndiretin KPI.Inc gaz-hımııa kesheni úshin syǵymdalǵan aýa men azot óndiretin qondyrǵy salǵan.
Sonda-aq Prezıdent «Orano S.A» kompanııasy Dırektorlar keńeciniń tóraǵasy Klod Imovendi qabyldady.
Kezdesý barysynda atom ónerkásibin damytý máseleleri talqylandy. Qasym-Jomart Toqaevqa kompanııanyń Qazaqstanda atqaryp jatqan jumysynyń qazirgi nátıjeleri men aldaǵy jospary tanystyryldy.
Klod Imoven KATCO birlesken kásiporny Qazaqstanda bir jylda óndiriletin ýrannyń 15 paıyzyn jáne álemdik óndiristiń 7 paıyzyn óndiretinin málimdedi.
Memleket basshysy Emmanýel Makronmen kelissóz barysynda Qazaqstan men Frantsııa arasyndaǵy ýran salasyndaǵy yntymaqtastyq máseleleri talqylanǵanyn jetkizdi.
Aıta keteıik, keshe 29 qarashada Memleket basshysy Qasym-Jomart Toqaev resmı saparmen Frantsııaǵa bardy.
Toqaevty Frantsııa prezıdenti Emmanıýel Makron Elıseı saraıynda qarsy aldy.
Memleket basshysy Emmanıýel Makrondy Qazaqstanǵa saparmen kelýge shaqyrdy.
Memleket basshysy Frantsýz halyqaralyq qatynastar ınstıtýtynyń prezıdenti Terrı de Monbrıalmen jáne Frantsııa Senatynyń tóraǵasy Jerar Larshemen kezdesti.
