QR Prezıdenti: Aǵylshyn tiliniń keregi ne deıtinder - qazaqqa qarsy jumys isteıtin adamdar
ASTANA. QazAqparat - Aǵylshyn tiliniń keregi ne deıtinder - qazaqqa qarsy jumys isteıtin adamdar. Bul týraly búgin Úkimettiń keńeıtilgen májilisinde Qazaqstan Prezıdenti Nursultan Nazarbaev aıtty, dep habarlaıdy QazAqparat.
QR Prezıdenti damyǵan elderde qabyldanǵan 12 jyldyq bilim berý júıesine kóshýdiń, úsh tilde oqytýdyń paıdasyn jáne ulttyq biryńǵaı testileýdiń paıdasyn halyqqa naqty túsindirý qajettigin basa aıtty. Bul rette Aqparat jáne kommýnıkatsııalar mınıstri Dáýren Abaevqa túsindirý jumystaryn qolǵa alýdy tapsyrdy.
«Men qabyldanǵan bul baǵyttardyń barlyǵy da durys dep sanaımyn. Biraq, ony durystap túsindirip, júzege asyrý qajet. Muny barlyǵy da túsinýi kerek. Qajettiligin kóp aıtqan bolatynbyz. Áı, onyń, aǵylshyn tiliniń keregi ne deıtin adamdar - qazaqqa qarsy jumys isteıtin adamdar, erteńimiz bolmasyn degen adamdar. Biz jalǵyz emespiz. 1,5 mlrd. astam halqy bar Úndistan táýelsizdik alǵan kezde hındı tiline kóshken bolatyn. 4 jyldan keıin qaıtadan aǵylshyn tiline oraldy. Malaızııa da sóıtken bolatyn. Ol da qaıtyp keldi. Sebebi, dúnıedegi barlyq ǵylym, jańalyq aǵylshyn tilinde bolyp jatyr. Qaıtemiz endi. Bizdiń sharýamyz emes, ol. Memlekettiń, dúnıeniń sharýasy. Jastarymyz, balalarymyz aǵylshyn tilin bilmese, Qazaqstannyń bolashaǵyna kedergi bolady. Túsindirý kerek», - dedi Nursultan Nazarbaev.
Sonymen qatar Elbasy bilim salasyndaǵy reformalardy qoǵammen jan-jaqty talqylap, túsindirý jumystaryn júrgizý kerektigin eskertti.
