QR Prezıdenti 2017 jyldyń enshisindegi aıtýly oqıǵalar men aýqymdy isterdi atady
ASTANA. QazAqparat - Barsha qazaqstandyqtardy Jańa jylmen quttyqtaǵan Qazaqstan Prezıdenti Nursultan Nazarbaev 2017 jyldyń enshisindegi aıtýly oqıǵalar men aýqymdy isterdi atady, dep habarlaıdy QazAqparat.
«Bıylǵy mereıtoılyq jyl biz úshin birqatar mańyzdy sharalarǵa toly boldy. Eldiń saıası ómirinde eleýli naýqan - Parlament saılaýyn ótkizdik. Uly maqsat kózdegen Ult josparynyń alǵashqy jylyn tabysty aıaqtadyq. Aldaǵy 2017 jyldyń enshisinde aıtýly oqıǵalar men aýqymdy ister mol bolmaq. Elimiz Birikken Ulttar Uıymy Qaýipsizdik keńesiniń turaqty emes múshesi retinde qyzmetin bastaıtyn bolady. Bul kez kelgen memleket qol jetkize bermeıtin asqaq abyroı, mártebeli mindet», - dedi Elbasy.
Memleket basshysy keler jyly Astana meımandary EKSPO-2017 halyqaralyq kórmesinde bas qosatyndyǵyn, sonymen qatar Almatyda Dúnıejúzilik qysqy ýnıversıadanyń alaýy jaǵylatyndyǵyn atap ótti.
«Eńseli elordamyzda Islam yntymaqtastyq uıymynyń sammıti ótedi. El qýatty bolmaı, baq turaqty bolmaıdy. Halyqtyń ál-aýqatyn arttyryp, ekonomıkamyzdy damytýǵa arnalǵan sharalar jalǵasyn tabady. Biz endi Táýelsiz elimiz úshin jańa 25 jyldyqtyń jarqyn paraǵyn ashamyz. Tabaldyryqtan attaǵaly turǵan Jańa jyl tabysty da taǵylymdy jyl bolsyn!» - dep quttyqtady qazaqstandyqtardy Elbasy Nursultan Nazarbaev.
