QR Prezıdenti janyndaǵy Sheteldik ınvestorlar keńesiniń derbes quramy jańartyldy
ASTANA. KAZINFORM — Qazir Keńestiń sheteldik quramyna 34 jetekshi halyqaralyq kompanııa men uıymnyń basshylary, sondaı-aq baıqaýshy mártebesindegi 8 ókil kiredi, dep habarlaıdy QR SІM Investıtsııa komıtetiniń baspasóz qyzmeti.
Komıtet taratqan aqparatqa sáıkes, Qazaqstan Respýblıkasy Prezıdentiniń 2026 jylǵy 1 shildedegi № 306 ókimimen Memleket basshysynyń 2024 jylǵy 1 qazandaǵy № 174 ókimimen bekitilgen Qazaqstan Respýblıkasy Prezıdenti janyndaǵy Sheteldik ınvestorlar keńesiniń derbes quramy jańa redaktsııada bekitildi.
Qazaqstan Respýblıkasy Prezıdentiniń janyndaǵy Sheteldik ınvestorlar keńesi — Memleket basshysynyń tóraǵalyǵymen jumys isteıtin konsýltatıvtik-keńesshi organ ári memleket pen halyqaralyq bıznes qaýymdastyǵy arasyndaǵy tikeleı dıalogtyń negizgi alańy. Keńes jumysyna dástúrli túrde álemdegi jetekshi kompanııalar men uıymdardyń basshylary qatysady. Búginde Keńestiń sheteldik quramyna 34 jetekshi halyqaralyq kompanııa men uıymnyń basshylary, sondaı-aq baıqaýshy mártebesindegi 8 ókil kiredi.
— Keńestiń jańartylǵan quramyna sheteldik taraptan jańa qatysýshylar engizildi. Buǵan deıin Keńes jumysyna baıqaýshy retinde qatysqan «Alstom» kompanııasynyń Afrıka, Taıaý Shyǵys jáne Ortalyq Azııa óńirleri boıynsha prezıdenti Martan Vojýr Keńestiń múshesi bolyp engizildi. Sonymen qatar «Power International Holding» kompanııasynyń basshysy Mutaz Ál-Haıat Keńes quramyna múshe retinde qosyldy. Al «Presight AI Holding PLC» kompanııasy basqarmasynyń tóraǵasy Tomas Pramotedham men Islam damý bankiniń prezıdenti Muhammad Súleıman ál-Djasser Keńestiń baıqaýshylary mártebesine ıe boldy, — delingen habarlamada.
Qazaqstandyq taraptyń quramy da jańartyldy. Keńes quramyna Qazaqstan Respýblıkasy Prezıdentiniń Ákimshiligi Basshysynyń orynbasary Ásel Janasova, Qazaqstan Respýblıkasy Prezıdentiniń ekonomıkalyq máseleler jónindegi kómekshisi Nurlan Baıbazarov, Qazaqstan Respýblıkasynyń Kólik mınıstri Nurlan Saýranbaev jáne Qazaqstan Respýblıkasy Syrtqy ister mınıstrligi Investıtsııa komıtetiniń tóraǵasy Ardaq Zebeshev engizildi.
Komıtet málimetinshe, keńestiń derbes quramyn jańartý memleket pen halyqaralyq bıznes arasyndaǵy syndarly dıalogty odan ári nyǵaıtýǵa baǵyttalǵan. Keńes jumysyna jetekshi halyqaralyq kompanııalar men qarjy ınstıtýttary basshylarynyń qatysýy ınvestıtsııalyq yntymaqtastyqty keńeıtýge, sondaı-aq Qazaqstannyń jahandyq kapıtal úshin ınvestıtsııalyq tartymdylyǵyn odan ári arttyrýǵa yqpal etedi.
Budan buryn Prezıdent birqatar sheteldik ınvestorlardy memlekettik nagradalarmen marapattaǵanyn jazǵanbyz.
