QR Prezıdenti Teleradıokesheni jáne ITAR-TASS yntymaqtastyq týraly kelisti
QR Prezıdentiniń Teleradıokesheni men TASS aqparat agenttigi Aqparat salasyndaǵy yntymaqtastyq týraly kelisimge qol qoıdy. Qol qoıý Reseı Federatsııasynyń Prezıdenti Vladımır Pýtınniń Qazaqstanǵa resmı sapary aıasynda ótti, dep habarlaıdy Kazinform.
Qujatqa QR Prezıdenti teleradıokesheniniń Bas dırektory Raýshan Qajybaeva men TASS AA Bas dırektory Andreı Kondrashov qol qoıdy.
Osy Kelisim boıynsha taraptar birlesken óndiris jáne kontent almasý, sondaı-aq jańa tehnologııalardy paıdalanýdaǵy ózara is-qımyl múmkindigin rastady.
«Bizdiń qujat aqparat almasý, kadrlar biliktiligin arttyrý jáne ózara qyzyǵýshylyq týdyratyn oqıǵalardy jarııalaý salasyndaǵy ekijaqty yntymaqtastyqty damytýǵa negiz jasaıdy. Ortalyq buqaralyq aqparat quraldary arasyndaǵy yntymaqtastyq aýdıtorııanyń habardarlyǵyn arttyrýǵa yqpal etedi», - dep atap ótti Raýshan Qajybaeva.
Aıta ketsek, QR Prezıdentiniń Teleradıokesheni – quramyna Jibek Joly respýblıkalyq telearnasy, Silk Way jáne Silk Way Sinema halyqaralyq telearnalary, «QazAqparat» HAA jáne Derekti kıno ortalyǵy kiretin tolyq tsıkldegi qazaqstandyq medıa-kompanııa.
TASS AA – Reseıdiń jetekshi memlekettik aqparat agenttigi. Bıyl qyrkúıek aıynda agenttikke 119 jyl toldy. Kún saıyn 6 tilde 3 myńǵa jýyq habarlama men Reseıdegi jáne sheteldegi menshikti tilshileriniń júzdegen foto jáne beıne materıaldaryn jarııalaıdy. Agenttiktiń Sankt-Peterbýrg, Novosıbırsk, Ekaterınbýrgtegi aımaqtyq aqparat ortalyqtary, Reseı oblystaryndaǵy ondaǵan bıýrosy, sondaı-aq 52 eldegi 57 ókildigi keń aýdıtorııaǵa Reseı jáne álemdegi oqıǵalar týraly obektıvti aqparatty jyldam alýǵa jáne taratýǵa múmkindik beredi.
