QR Prezıdenti Sıngapýrdyń Ulttyq qaýipsizdik jónindegi úılestirýshi mınıstri Teo Chı Hındi qabyldady
ASTANA. KAZINFORM – Memleket basshysy Sıngapýrdyń aǵa mınıstri – Ulttyq qaýipsizdik jónindegi úılestirýshi mınıstr Teo Chı Hındi qabyldady, dep habarlaıdy Aqordanyń baspasóz qyzmeti.
Qasym-Jomart Toqaev pen Teo Chı Hın eki el arasyndaǵy saıası jáne ekonomıkalyq yntymaqtastyqtyń qazirgi jaı-kúıi men damý perspektıvasyn talqylady.
Memleket basshysy Astananyń senimdi dıalogqa, berik saýda jáne ınvestıtsııalyq baılanystardy odan ári nyǵaıtýǵa negizdelgen ekijaqty seriktestiktiń jańa kezeńine jol ashýǵa daıyn ekenine toqtaldy.
Prezıdent búgingi 46-shy Sıngapýr lektsııasynda aımaqtyq qaýipsizdik, turaqtylyq jáne ornyqty damý taqyryby boıynsha sóz sóıleý zor mártebe ekenin jetkizdi.
Sıngapýrdyń aǵa mınıstri Teo Chı Hın Ońtústik-Shyǵys Azııany zertteý ınstıtýtyna kelgeni úshin Qasym-Jomart Toqaevqa alǵys aıtty. Ol áleýmettik-saıası úrdisterdi, óńirdegi qaýipsizdik máselelerin jáne ekonomıkalyq jaǵdaıdy zertteýde Qazaqstan Prezıdentiniń dárisi ózekti sanalatynyna toqtaldy.
Memleket basshysy men Sıngapýrdyń aǵa mınıstri halyqaralyq jáne aımaqtyq kún tártibindegi máseleler jóninde pikir almasty.
Kezdesý sońynda Qasym-Jomart Toqaev Teo Chı Hınge óziniń «Belasý» kitabynyń aǵylshyn tilindegi nusqasyna qoltańba berdi. Aıta keterligi, Teo Chı Hın bul kitapty Qazaqstanǵa jasaǵan saparynda satyp alyp, zor yqylaspen oqyp shyqqan.
Osyǵan deıin Memleket basshysynyń Sıngapýr Prezıdentiniń Istana saraıyna barǵanyn jazdyq.
Qasym-Jomart Toqaev Sıngapýr Respýblıkasynyń Prezıdenti Tarman Shanmýgaratnammen kelissóz júrgizdi.
Sondaı-aq Memleket basshysy jaqynda Sıngapýrdyń Premer-mınıstri laýazymyna taǵaıyndalǵan Loýrens Vongty quttyqtap, onyń jańa memlekettik qyzmetine tabys tiledi.
Budan soń QR Prezıdenti Sıngapýr Premer-mınıstriniń orynbasary – Ekonomıkalyq saıasat jónindegi úılestirýshi mınıstr Heng Sýı Keatty qabyldady.
Qasym-Jomart Toqaev Qazaqstan-Sıngapýr bıznes forýmynyń jabylý rásimine qatysyp, sóz sóıledi.
Bıznes-forým aıasynda ekijaqty birqatar qujatqa qol qoıyldy.
